Tenistja amerikane 34-vjeçare ia ka dalë më në fund të fitojë Grand Slam-in e 22-të, për të barazuar kështu rekordin e gjermanes Steffi Graf.
Serena Williams kishte provuar dy herë gjatë këtij viti të fitonte një Grand Slam, por qe ndalur në të dy finalet.
Në Australian Open, në finalen e janarit, do të mposhtej pikërisht nga finalistja e sotme, Angelique Kerber, e në Roland Garros, në Francë, humbja do t’i vinte në finale nga Garbine Muguruza.
Por këtë herë Kerber nuk do të mund të shkaktonte një tjetër çudi, duke u dorëzuar në luftën e nervave ndaj Williams-it.
Serena, numri një i botës, fitoi 2-0 ndaj gjermanes Kerber, e katërta në renditjen botërore. 7-5 dhe 6-3 qenë setet e fituara nga Williams, në një takim që zgjati një orë e 23 minuta.
Tenistja amerikane e fitoi për herë të shtatë turneun e Wimbledon-it, duke humbur vetëm një set gjatë gjithë turneut. /tesheshi.com/
