Shefi i politikës së jashtme të BE-së, Josep Borrell i bëri thirrje Serbisë që të përshpejtojë harmonizimin e saj me politikën e përbashkët të jashtme dhe të sigurisë të BE-së sa më shpejt të jetë e mundur, dhe të zbatojë sanksionet e miratuara nga BE-ja dhe vendet e tjera të Ballkanit Perëndimor për luftën në Ukrainë.
“Ministrat e Jashtëm të BE-së kanë shprehur një pritje të qartë nga partnerët e BE-së dhe anëtarët e ardhshëm për t’u përkushtuar ndaj vlerave të përbashkëta dhe një politike të përbashkët të jashtme dhe të sigurisë. Ata që nuk e kanë bërë ende, dhe Serbia është njëra prej tyre, duhet të përshpejtojnë harmonizimin e tyre dhe të aplikojnë sanksione sa më parë. Ne i kuptojmë vështirësitë dhe vlerësojmë faktin që të gjithë votuan kundër Rusisë në Asamblenë e Përgjithshme të OKB-së, por ne presim që kandidatët dhe partnerët tanë të përafrohen plotësisht me politikën tonë të jashtme”, tha Borrell.
Ai pretendon se propaganda dhe dezinformata ruse janë të përhapura në Ballkanin Perëndimor dhe paralajmëron se në këtë situatë, edhe statusi neutral i vendeve kandidate për në BE nuk është në përputhje me të ardhmen e tyre evropiane.
“Mbajtja e marrëdhënieve të ngushta me regjimin e Putinit nuk është më në përputhje me ndërtimin e një të ardhmeje të përbashkët me BE-në. Këto dy gjëra nuk funksionojnë. Neutraliteti në lidhje me luftën në Ukrainë është një koncept i gabuar. Një vend sulmoi një tjetër dhe vendosja e tyre në të njëjtin nivel do të thotë të barazosh sulmuesin dhe viktimën, dhe kjo nuk është e mundur”, përfundoi Borrell.
Ai thekson se BE-ja “e kupton” se në Ballkanin Perëndimor, kur bëhet fjalë për Moskën, ka “probleme, lidhje dhe opinion publik”, por rithekson se ka gjëra që nuk mund të shkojnë bashkë. /tesheshi.com/
