Presidenti i Serbisë, Aleksandër Vuçic, ka zbuluar bisedën që ka pasur në selinë e NATO-s në Bruksel 10 ditë më parë, me Këshillin e Ambasadorëve. Dhe këtë e bën në një intervistë për agjencinë ruse të lajmeve Tass. Vuçiç e ka dhënë intervistën para një vizite që pritet të zhvillojë në Moskë në lidhje me marrjen e 6 helikopterëve modernë rusë.
Presidenti i Serbisë ka deklaruar se ai i ka bërë të ditur krerëve të NATO-s se vendi i tij do të vazhdojë të jetë neutral ushtarakisht dhe nuk do të hyjë në asnjë aleancë ushtarake.
Por Vuçiç tha se qeveria e tij do të blinte edhe 6 sisteme ajrore shtesë dhe 6 helikopterë luftarakë. Presidenti serb nuk specifikoi se cilat janë shtysat që Serbia është armatosur aq shumë sa ka blerë prej dy vjetësh një sasi të madhe MIG 29, tanke T28, si dhe të tjera arsenale.
Përpara takimit me Putin, Vuçiç tha se ai do të diskutojë me presidentin rus se Serbia synon që të forcojë mbrojtjen e saj për të qenë e përgatitur ndaj çdo rasti.
Megjithatë, në intervistën e Vuçiç për agjencinë Tass, ka një detaj që nuk mund të iket pa e analizuar. Ai e quan Rusinë një “partner të ngushtë” dhe jo si deri tani “vëllai dhe mbrojtësi i Serbisë”.
“Serbia ka marrë një vendim jo të lehtë. Dhe ne kemi menduar për të ardhmen dhe jo vetëm për të shkuarën kur kemi përcaktuar se Rusia do të jetë një nga partnerët tanë të ngushtë. Dhe këto marrëdhënie kanë ecur falë një personi si Vladimir Putin, i cili ka kontributin e tij më të rëndësishëm. Nëse kujtojmë paraardhësit e tij, Serbia nuk ekzistonte për ta. Vetëm Putin gjatë mandatit të tij ka kushtuar kujdes për ne”, tha Vuçiç.
Pra siç tha edhe zyrtari i lartë i DASH, Serbia po vazhdon të qëndrojë në dy karrike. Dhe natyrisht këtë e bën për të tërhequr vëmendjen deri sa të arrijë pikësynimiet që ka: nëse futet në BE qarë, edhe nëse s’futet Rusinë e ka aty. /tesheshi.com/
