Ndërsa çdo ditë po mbahen protesta si në Kosovë dhe shtete të ndryshme me kërkesë lirimin e plotë të Ramush Haradinajt, kreu i Prokurorisë për krime të luftës në Serbi, Milan Petroviq, ka trazuar opinionin me deklaratën e bërë se “ekziston mundësia që lideri i AAK-së, të ekstradohet për në Gjykatën Speciale”.
Por një gjë të tillë kategorikisht e hedh poshtë mbrojtja e Haradinajt, duke thënë se edhe vet Avis Benes, zëdhënësja e Speciales, me datën 5 janar ka deklaruar se “ndalimi i Haradinajt nuk është kryer në kuadër të mandatit të Dhomave Speciale të Kosovës”.
“Kjo natyrisht nuk është e vërtetë. Po përdoret diskurs spekulativ që të mbulohet natyra politike e kërkesës së Serbisë”, ka thënë avokati Arianit Koçi.
Ky i fundit më tej ka bërë të ditur se Serbia po e zvarritë procesin duke mos e dërguar kërkesën dhe dokumentet përcjellëse ku më pas do mbahej seanca përfundimtare gjyqësore.
Ndryshe, Haradinaj është duke qëndruar në Francë pas vendimit për lirim me kusht nga Gjykata në Colmar. /tesheshi.com/
