Pas ultimatumit gjerman që të ndalojë lidhjet me Rusinë nëse do të bëhet pjesë e BE-së, Serbia ka marrë një tjetër vendim që do të acarojë Perëndimin.
Një nga miliarderët më të mëdhenj rusë, i cili është i hetuar në SHBA dhe në BE për pasurim të dyshimtë, është emëruar si konsull nderi i Serbisë në Shën Petersburg.
Sipas televizionit serb B92, ky emërim ka shkaktuar trazime në Beograd dhe mund të hapë polemika në lidhje me infiltrimin rus në Ballkan.
Qeveria serbe ka emëruar biznesmenin rus, Gennady Timchenko si lobues të saj në Rusi.
Miliarderi 63-vjeçar është themelues i holdingut Volga Group dhe pjesëtar i këshillit të drejtorëve të konsorciumit petro-kimik Sibur, si dhe investitori në kompaninë më të madhe të nxjerrjes së naftës në rusi, Novatek.
Timchenko, një mik i ngushtë i presidentit rus Vladimir Putin, zotëron një pasuri prej 11.4 miliard dollarësh dhe është i pesti në listën e Forbes për njerëzit më të pasur të Rusisë.
Siç bën të ditur portal rus Sputnik, ai është i përfshirë edhe në veprimtari filantropike por edhe në sponsorizimin e sportit.
Timchenko ka dyshtetësi, ruse dhe finlandeze dhe është një nga biznesmenët e parë që kanë kundërshtuar sanksionet e Perëndimit ndaj Rusisë.
Ai e ka cilësuar një hetim që ka nisur në SHBA ndaj tij, si një sulm personal ndaj Vladimir Putinit, duke shtuar se provokacione të tilla bëhen shpesh nga SHBA.
“Unë e them hapur dhe me vendosmëri, nëse nevojitet, të gjithë pasurinë ia jap shtetit apo për bamirësi. Kam folur me gruan dhe ne nuk kemi nevojë për miliarda që të jetojmë”, tha Timchenko në një intervistë për televizionin publik rus.
Hapja e konsullatës serbe në Shën Petërsburg është planifikuar për datën 12 tetor, ku do të jetë prezent vetë presidenti serb, Tomislav Nikoliç.
Të gjithë këto zhvillime vijnë pas një ultimatum që i ka ardhur Beogradit nga Gjermania.
Një politikan i lartë i partisë së kancelares Merkel, Michael Roth, ka deklaruar për të përditshmen serbe Vecernije Novosti, se “Nëse Serbia do të ketë marrëdhënie të mira me Gjermaninë, duhet të shkëpusë marrëdhëniet me Rusinë”.
Kjo deklaratë u sulmua edhe nga kabineti i presidentit serb, por edhe nga shefi i diplomacisë, Iviça Daçiç, i cili e cilësoi se “deklarata e Ruth ishte e pakta e papërshtatshme”. /tesheshi.com/
