Nis të konkretizohet marrëveshja mes komandës së KFOR-it dhe ushtrisë serbe, e cila para dy javësh hapi polemikat në Kosovë dhe solli shefin e shtabit serb në Prishtinë, i cili akuzohet për krime lufte.
Pas kësaj marrëveshjeje, ushtria serbe riaktivizon radarët ushtarakë në vendin e quajtur Maja e Panqiqit, që ndodhet në komunën e Leposaviqit në veri të Kosovës, nga ku kontrollon gjithë hapësirën ajrore të Serbisë, Kosovës dhe Shqipërisë.
Siç njofton Top Channel, qendra e radarëve serbë shtrihet në fund të territorit të Kosovës në pjesën veriore në një lartësi prej 2 mijë e 17 metra mbi nivelin e detit.
Eksperti i sigurisë, Florian Qehaja, tha se riaktivizimi nga ana e Serbisë i radarëve që ndodhen në territorin e Kosovës, përbën shkelje të sovranitetit, për të cilën gjë ai fajëson forcat e NATO-s në Kosovë, që janë përgjegjës për vijën kufitare mes Kosovës dhe Serbisë.
Edhe hartat zyrtare dhe dokumentet kadastrale të Kosovës, konfirmojnë se qendra e navigacionit dhe radarëve ndodhet brenda territorit të Kosovës.
Radarët e riaktivizuar nga shteti serb ishin objektivi i parë sulmeve të NATO-s ndaj Serbisë më 1999, pasi e konsideronte këtë radar si “veshë e sy” për Beogradin dhe sistemin e sigurisë së Serbisë. /tesheshi.com/
