Serbia ka nisur me të madhe lobimin në mesin e shteteve anëtare që të parandalojë anëtarësimin e Kosovës në Interpol. Siç shkruan gazeta “Blic”, Serbia ka formuar grupin punues, i cili përbëhet nga Ministria e Punëve të Jashtme, Ministria e Punëve të Brendshme dhe e ashtuquajtura Zyrë për Kosovën.
Burime të kësaj gazete serbe thotë se është në pikëpyetje të madhe që lidhur me këtë çështje të mos diskutohet në shtator.
Burimi i “Blic”, i afërt me grupin punues, thotë se edhe nëse kjo temë do të jetë në rendin e ditës në Pekin, nuk do të thotë se Kosova do të bëhet pjesë e Interpolit.
Ndërsa krerët serbë po lobojnë, në Kosovë vërehet një mungesë mobilizimi institucional e diplomatik që mund të prodhojë fare lehtë një rezultat dështimi, njëjtë siç ndodhi në vitin 2015-të kur u humb beteja për t’u bërë pjesë e kësaj organizate botërore të policisë që lufton krimin edhe jashtë kufijve shtetërorë.
Kujtojmë se për anëtarësim në Interpol nevojiten dy të tretat e votave dhe se Serbia ka besim të madh në lobimin e Kinës dhe Rusisë për të mos lejuar anëtarësimin e Kosovës në Interpol.
Ndryshe, kërkesa e Kosovës për anëtarësim në Interpol pritet të jetë në rendin e ditës në seancën e asamblesë së përgjithshme të kësaj organizate, e cila do të mbahet në muajin shtator, në Pekin.
Në Interpol janë të anëtarësuara 186 shtete. /tesheshi.com/
