Serbia akuzoi Kroacinë se ka ndërmarrë një luftë tregtare kundër saj, e se masat janë të gatshme për t’iu kundërpërgjigjur bllokadës kroate. “Serbia është sulmuar”, tha ministri i Jashtëm serb, Ivica Daçiç për një televizion në Beograd.
Kundërmasat e Serbisë për shkak të vendimit të Kroacisë e cila mbylli vendkalimet kufitare për transportin e mallrave, hyjnë në fuqi sonte në mesnatë, nëse nuk do të ketë marrëveshje mes palëve.
Mirëpo Kroacia duket e sigurtë në veprimet e veta, pasi me vete ka atë që nuk e zotëron Beogradi, anëtarësimin në Bashkimin Europian.
Kryeministri i Kroacisë, Zoran Millanoviç tha një ditë më parë se “Serbia nuk mund të shpallë masa hakmarrëse kundër Kroacisë, pasi kjo do të thoshte veprim kundër Bashkimit Evropian”.
“Serbia nuk mundet, edhe nëse dëshiron, të imponojë masa pasi Kroacia ka marrrëveshje me BE-në”, u tha Millanoviç gazetarëve, duke shtuar se “gjithçka që Serbia bën, ose mendon të bëjë, kjo do të jetë kundër BE-së dhe jam i bindur se Serbia nuk do ta bëjë këtë”.
Lufta e deklaratave mes dy vendeve pason bllokimin në kufirin mes tyre të kamionëve që transportonin mallra. Shoferët,
të zemëruar nga pritjet e gjata në kufirin e Kroacisë me Serbinë, madje, bllokuan trafikun në autostradën më të madhe ndërmjet dy vendeve.
Shoferët e zemëruar i kanë fikur kamionët në atë që quhet “tokë e askujt”, duke bllokuar gjithë trafikun. /tesheshi.com/
