“Ne presim që Serbia të veprojë në përputhje me detyrimin për të harmonizuar politikën e jashtme dhe të sigurisë me politikën e Bashkimit Evropian (BE)”, tha shërbimi për shtyp i Unionit për Radion Evropa e Lirë (RFE).
Kështu, Brukseli iu përgjigj lajmeve se Serbia mbështeti deklaratën që përcakton shkeljen e të drejtave njerëzore dhe të pakicave të ujgurëve në provincën kineze të Xinjiang si “luftë kundër terrorizmit dhe ekstremizmit”.
Duke mbështetur deklaratën, Serbia u gjend kundër vendeve të Evropës dhe botës që dënojnë me forcë fushatën kineze të represionit ndaj pakicës muslimane të ujgurëve, dhe mbi të gjitha arrestimin masiv të këtyre njerëzve në të ashtuquajturat “kampe për riedukim politik”.
“Serbia ndjek një politikë të vazhdueshme ndaj Republikës Popullore të Kinës, duke respektuar integritetin e saj territorial dhe Kina duhet të zgjidhë punët e saj të brendshme pa presion nga bashkësia ndërkombëtare,” i tha Veroljub Arsiç, një zyrtar i Partisë Progresive Serbe (SNS).
Duke komentuar faktin se një veprim i tillë nga Beogradi është në kundërshtim me politikën e BE-së, anëtarësimi i të cilit Serbia dëshiron, Arsiq ka thënë se mund të flitet për “kur Serbia merr pjesë në vendimmarrjen e Bashkimit Evropian”.
“Deri atëherë, Serbia është një shtet i pavarur, sovran dhe ndjek një politikë të pavarur në përputhje me interesat e saj, duke respektuar ligjin ndërkombëtar.” /tesheshi.com/
