Serbia ka liruar nga burgu të dënuarin për ekzekutimin e shtatë fëmijëve në oborrin e një shtëpie në vitet 1998-99 në Kosovë, e kjo tre vjet para përfundimit të dënimit. Fjala është për Miodrag Sholajan, të cilit i atribuohen 14 jetë të marra ndër shqiptarë
Reagimet në Prishtinë kanë qenë të menjëherëshme, Jahja Lluka, këshilltar i Haradinajt, tha se “ne jemi të indinjuar me këtë lirim”. “Dhe duhet me thënë hapur që Serbia po vazhdon për përfitime të veta ndaj Bashkimit Evropian kinse i dënon kriminelët, në anën tjetër ata nuk e mbajnë dënimin asnjëherë”, shtoi ai.
Miodrag Sholaja kishte luftuar në kuadër të njësisë e njohur si “Akrepat”, gjatë luftës së viteve 1998-99 në Kosovë.
Sipas Llukës, “Akrepat” mendohet të kenë kryer edhe krime të tjera, përveç vrasjes së 14 civilëve.
“Nuk mund të ketë pajtim me Serbi në derisa kriminelët lirohen. Dhe është keq me fol, por nëse një shqiptar vlen 10 muaj ose 12, atëherë çfarë drejtësie është kjo dhe çfarë pajtimi kërkojnë ata”, shtoi Lluka.
Për lirimin e tij, reagoi edhe zv/kryeministri Enver Hoxhaj: “Këto ditë në Serbi është liruar nga burgu, tre vjet para përfundimit të dënimit, personi i cili është akuzuar dhe dënuar për vrasjen e 14 civilëve shqiptarë në Kosovë. Nga ky krim arritën të shpëtojnë pesë fëmijë, e në mesin e tyre edhe Saranda Bogujevci. Lirimi i kriminelit serb është dëshmi që Serbia po vazhdon të luaj me nervat e të gjithve në të gjitha planet, madje edhe atë ushtarak!”, shkroi Hoxhaj.
Nga ana tjetër, ministri i Jashtëm Pacolli tronditet dhe nga heshtja ndërkombëtare nga lirimit të Sholajas.
“Çështja këtu nuk është vetëm lirimi i Sholajas, por edhe heshtja e komunitetit ndërkombëtar dhe e delegacionit të BE-së në Beograd. Ky është realiteti se si kriminelët e luftës në Serbi janë heronj dhe lartësohen nga qeveria e Ana Brnabiç”, shprehet Pacolli. /tesheshi.com/
