Qeveria e Serbisë sot ka mbajtur mbledhjen e jashtëzakonshme me temë të vetme lirimin e djeshëm me kusht të ish- kryeministrit të Kosovës Ramush Haradinaj. Ndonëse kreu i AAK-së nga drejtësia franceze u lirua me kusht deri në vendimin përfundimtar, Serbia shpreson në ekstradimin e tij.
Serbia nuk heq dorë nga ekstradimi dhe kërkon nga organet franceze që sa më shpejt ta dorëzojnë Ramush Haradinjan. “Nuk heqim dorë nga ekstradimi. Hetimi është zgjeruar edhe me 30 dëshmitarë të rinj”, ka thënë ministrja serbe e Drejtësisë, Nela Kuburoviç.
Kurse, Marko Gjuriç, drejtor i së ashtuquajturës Zyrë për Kosovën, ka thënë se “Serbia s’e pranon Drejtësinë që lë të padënuar vrasjen e civilëve”, të cilën sipas tij, e ka bërë Haradinaj.
Gjuriç ka pohuar se “nëse Franca nuk vepron në përputhje me kërkesën tonë për ekstradimin e Haradinajt përmes Interpolit, të njëjtën gjë do ta bëjmë edhe ne në raste të tilla nëse shteti francez e kërkon prej nesh. E njëjta gjë vlen edhe për shtetet tjera evropiane dhe botërore. Serbia kërkon me ngulm ekstradimin e Haradinajt”.
Ndryshe, Haradinaj do mbetet në Francë ku do paraqitet dy herë në javë tek policia e këtij vendi, deri në marrjen e një vendimi tjetër nga gjykata. /tesheshi.com/
