Edi Rama dhe Hashim Thaçi, në 2014-ën dhanë 50 mijë euro për maternitetin e Preshevës. Me këtë shifër është tallur vetë kryeministri i Serbisë, Aleksandër Vuçiç, i cili kur inaguroi maternitetin iu drejtua kryekomunarit të Preshevës: “Ragmi po këta të tutë s’kishin ndonjë lek më shumë po vetëm 50 mijë dhanë…Nejse edhe aq i falënderojmë”.
Ndërkohë, Isa Mustafa u bë edhe më xhymert dhe e zgjidhi qesen: dha 450 mijë euro për shqiptarët e Luginës.
Ndërkaq sot Beogradi ka akorduar 2 milionë euro (222 milionë dinarë) për krahinën që e ka në administrim e ku jetojnë shqiptarë etnikë.
Kjo natyrisht bëhet në prag të zgjedhjeve parlamentare.
Siç bën të ditur “Presheva Jonë”, ky është një mesazh i qartë i Beogradit dërguar Luginës se “problemet zgjidhen jo në Prishtinë e Tiranë por në Beograd dhe se harrojeni bashkimin me Kosovën.”
Qeveria e Serbisë përmes Trupit Koordinues për Luginën e Preshevës të drejtuar nga Zoran Stankoviç, ndau paratë: Bujanoci do t’i jepen 114.4 milion dinarë, Presheva 105 milionë dhe Medvegja 36.1 milion dinarë.
Stankoviç ka thënë se fondet për infrastrukturën dhe aktivitetet e pushtetit lokal në jug të Serbisë në vitin 2016 u rritën me gjashtë milionë dinarë në krahasim me vitin e kaluar. Stankoviç është i bindur se ka dështuar ideja që shqiptarët e jugut të Serbisë të krijojnë “Zajednicën” e tyre sikurse ajo e serbëve në Kosovë. /tesheshi.com/
