Një dokument qeveritar i Beogradit ka ngjallur kuriozitet pikërisht se sjell një qasje ndryshe të Serbisë karshi Kosovës.
Në mesin e fushatës elektorale, që edhe mund të dëmtojë Vuçiçin në zgjedhje, është publikuar një hartë e Serbisë e cila nuk e ka Kosovën, gjë që me fjalë të gjithë politikanët e Beogradit e cilësojnë si pjesë e pandarë e vendit të tyre.
Edhe pse de fakto e de jure Kosova është shtet i pavarur i njohur e i çertifikuar, Serbia vazhdon propogandën për ta quajtur si “zemrën serbe”.
Megjithatë, gjatë vizitës së ministrit të jashtëm austriak në Beograd, Kryeministria e Serbisë ka publikuar një hartë, që është komentuar mjaft nga mediat vendase.
Kurz dhe Vuçiç kanë prezantuar një plan bashkëpunimi ndërmjet dy vendeve që parashikon vazhdimin e mbështetjes së Vjenës për Beogradin në rrugën drejt BE-së.
Disa media serbe e kanë quajtur skandaloz dokumentin pasi Kosova është lënë jashtë hartës së Serbisë.
Mediat serbe shkruajnë se asgjë nuk do të ishte kontestuese nëse Vuçiç dhe Kurz në këtë plan nuk do ta prezantonin Kosovën të ndarë nga Serbia.
Në tekstin e këtij plani thuhet se Austria do ta mbështesë normalizimin e raporteve ndërmjet Beogradit dhe Prishtinës, ndërkohë që parashihet bashkëpunim për marrëdhëniet e mira ndërfqinjësore dhe zgjidhjen e kontesteve bilaterale.
Por ajo që i ka penguar mediat serbe është ana ilustrative e planit ku Kosova nuk është pjesë e hartës së Serbisë. Kjo në mediat serbe është interpretuar se Vuçiç dhe Kurz janë pajtuar që Kosova të mos jetë pjesë e Serbisë. /tesheshi.com/
