Nga Bashkim Kastrati
Shumë qytetarë të Kosovës që kanë punuar për shumë vite, i kanë paguar kontributet pensionale në kohën kur Kosova ishte pjesë e Jugosllavisë. Por, këto para i ka marrë padrejtësisht Serbia. Nuk ka pasur shifra zyrtare në lidhje me këtë fond, por ka supozime se ky fond është mbi një miliard euro.
Këtë shumë e konsideron reale edhe Avokati i Popullit Hilmi Jashari. Ai ka deklaruar se Serbia u ka borxh pensionistëve të Kosovës rreth një miliard euro. Avokati Jashari ka treguar se u ka dërguar një rekomandim Komitetit të Ministrave të Këshillit të Evropës që të detyrojnë shtetin e Serbisë të bëjë pagesën e pensioneve të mbetura nga viti 1999. Ai ka thënë se Komiteti i Ministrave e kanë konfirmuar se kanë pranuar këtë rekomandim dhe se shpreson që të zgjidhet shpejtë kjo çështje.
Jashari për këtë çështje tha se janë duke bashkëpunuar edhe me Qeverinë e Kosovës, të cilët i kanë edhe statistikat e sakta se sa pensionistë nuk i kanë marr më pensionet që nga përfundimi i luftës në Kosovë.
Edhe pse janë mbajtur me dhjetëra takime ndërmjet Qeverisë së Kosovës dhe asaj të Serbisë me ndërmjetësimin e Bashkimit Evropian ku është diskutuar dhe janë arritur marrëveshje për tema të ndryshme, çuditërisht Qeveria e Kosovës ende nuk e ka shtruar si temë diskutimi fondin e pensionistëve të Kosovës.
Sipas njohësve të rrethanave politike në Kosovë, tema e fondit pensional të qytetarëve të Kosovës, e cila është marrë nga Serbia, do të duhej që të ishte ndër prioritetet e Kosovës në dialogun që po realizohet në Bruksel.
Kthimi i fondit të pensioneve duhet të jetë ndër kushtet e palës kosovare në bisedime
Publicisti Faik Krasniqi ka thënë për tesheshi.com se pala kosovare para se të futej në bisedime me Serbinë, është dashur që të vendos një sërë kushtesh, marrë parasysh që Serbia ka zhvilluar luftë në Kosovë dhe se Kosova ishte pala e dëmtuar.
“E një ndër kushtet do të duhej të ishte edhe borxhi i pensionistëve të Kosovës, që është më shumë se një miliard euro. Por pala kosovare asnjëherë nuk i ngriti si tema në dialog me Serbinë.
Për ta vazhduar dialogun me Serbinë, edhe borxhi i pensionistëve të Kosovës, duhet të jetë temë e dialogut, por edhe zbatimi i reciprocitetit”, thotë Krasniqi.
Ai ka thënë se pala e Kosovës në këto bisedime, duhet që të ngritë më shumë tema që janë në interes të qytetarëve të Kosovës, pasi që siç ka shkuar dialogu deri më tani, prioritet kanë qenë temat e ngritura nga Serbia.
“Në të kundërtën nuk ia vlen më të vazhdojë dialogu me këtë shtet, sepse deri më tash ky dialog ka qenë vetëm në favor të Serbisë, e më shumë në dëm të Kosovës. Një ndër favoret më të mëdha ishte krijimi i ”Zajednicës ” serbe”, theksoi Krasniqi.
Ndërsa opinionisti Islam Krasniqi, ka thënë për tesheshi.com se kjo temë është dashur të harrohet deri më tani, sepse pensionistët e Kosovës që nga viti 1997-98 nuk e gëzojnë pensionin e tyre, dhe Qeveria e Kosovës është dashur ta kryej këtë obligim vite më parë.
“Republika e Kosovës ka mbi 60 mijë kontributdhëns, që kanë punuar në ish-Jugosllavi, dhe shteti i Serbisë i ka plaçkitur kontributet dhe pensionet e tyre, ku rreth 20 vite ata nuk gëzojnë pensionin që ju takon”, thotë Krasniqi.
Ai thotë se në vitin 2012, shteti serb u detyrua me një vendim të Gjykatës së Strasburgut që t’i kthejë Kosovës mbi një miliard euro pensione, mirëpo ajo ka mbetur vetëm në letër, sepse në praktik nuk ka ndodhur dhe se qeveria po rrinë në gjumë dhe për këtë çështje vetëm, Avokati i Popullit i është drejtuar Komitetit të Ministrave në Këshillin e Evropës.
“Pala Kosovare duhet patjetër që këtë ta ngre si temë në Bruksel, dhe të jetë si temë parësore, sepse duke e neglizhuar këtë çështje pala kosovare, është bërë vonë se shumë pensionistë sot nuk janë në mesin tonë, andaj të bëjmë këtë temë si kryesore në bisedime që t’i gëzojmë edhe këtë numër që kanë mbetur ende në mesin tonë”, u shpreh Krasniqi.
Kthimi i fondit të pensioneve do të ndikonte në zhvillimin ekonomik të Kosovës
Kthimi i fondit të pensioneve do të kishte ndikim edhe në ekonominë e Kosovës në shumë dimensione. Ekonomisti Lulzim Beqiri, ka thënë për tesheshi.com se nëse ka trysni dhe Serbia e rikthen në Kosovë fondin pensional, ky fond do të kishte shumë efekt pozitiv sa i përket mirëqenies së jetës së qytetarëve, konkretisht në këtë rast pensionistëve.
“Do të ishte edhe një barrë më pak për qeverinë e vendit në plotësimin e nevojave të kësaj kategorie. Kthimi i këtyre mjeteve do të ndikonte edhe në një zhvillim ekonomik më të mirë, pasi që ato para edhe mund të investohen dhe të rritet mirëqenia e pensionistëve. Gjithashtu mund të përdoren edhe për kredi afatshkurtra dhe shumë destinime të tjera”, thotë Beqiri.
Ai thotë se Serbia duhet të paguajë dëmshpërblim për shfrytëzimin e padrejtë të atyre mjeteve duke i kthyer këto mjete në vendin e duhur dhe duke kërkuar falje publike duke paguar dëmshpërblimin dhe vetëm atëherë Kosova nuk kishte pas nevojë ta padisë në gjykatat ndërkombëtare. /tesheshi.com/
