Nga Blendi Gashi
Ambasadori amerikan në Prishtinë Greig Delawie, bëri një gjest tipik diplomatik së fundi, duke pritur në zyrë serbin e përfolur të qeverisë “Haradinaj”, Nenad Rikalo. Opozita kosovare kërkon me ngulm largimin e tij pas akuzave të banorëve të lagjes “Dardania” që thonë se Rikalo është sjellë si kriminel me ta gjatë kohës së luftës. Por pritja që i ka bërë Delawie, në emër të interesimit amerikan për mbarëvajtjen e bujqësisë kosovare, në krye të së cilës është vendosur Rikalo, e ka të qartë mesazhin e mbështetjes ndaj për praninë në kabinetin e Haradinajt.
Çfarë do bëjë tani opozita kosovare dhe a është e mundur vërtet një largim i Rikalos nga qeveria? Për momentin ka një angazhim të përqëndruar në fushatë, por pasi ajo të mbarojë do shihet nëse Rikalo do jetë sërish në axhendën e opozitës, për t’u nxjerrë jashtë qeverisë si një ish-kriminel.
Po ashtu, mbetet të shihet nëse do reagojë dhe Prokuroria për të ngritur ndonëj akuzë ndaj Rikalos, apo do të stepet para mesazhit amerikan, duke nxjerrë kështu gënjeshtarë ata banorë që kanë dëshmuar në media kundër fqinjit serb, Nenad Rikalo, që jua ka nxirrë jetën ato kohë të vështira për ta kur serbi vriste e priste.
Po protesta kundër Rikalos do të ketë?
Pas seancës së 3 tetorit ku opozita u përplas me Haradinajn për Rikalon, e ku Ramushi nuk pranoi ta shkarkonte, u paralajmëruan dhe protesta nga ana e saj.
“Shkarkojeni dhe emëroni një ministër tjetër që nuk ka bërë krime. Nëse ju e mbroni, jeni përgjgjegjës për protestat që do pasojnë dhe ata që e mbrojnë krimin do jenë bashkëfajtor, kur ky krim do vërtetohet. Dëgjoni zërin e qytetarëve dhe Kuvendit në mënyrë që të mos përsëriten protestat”, tha deputetja Kadaj-Bujupi. Por edhe pse nga koha e këtij përbetimi kanë kaluar aktësisht 15 ditë, asnjë protestë nuk është organizuar me kërkesë shkarkimin e Rikalos.
Mbetet të shihet nëse kjo do të ndodh pas lokaleve të 22 tetorit. /tesheshi.com/
