Nga irritimi dhe fjalët kërcënuese që mobilizuan edhe qeverinë serbe me rastin e pranimit në UEFA të Kosovës, me pranimin e mbrëmshëm në FIFA, mediat serbe kanë kaluar në nota melodramatike duke marrë rolin e viktimës.
Pikërisht, këtë mëngjes shtypi serb ka sjellë qarje titullore me rastin e vendimit të mbrëmshëm në Kongresin e FIFA-s në Meksiko.
Tabloidi serb Informer titullon se “FIFA i fut thikë pas shpine Serbisë”, me rastin e pranimit të Kosovës.
Kjo gazetë që njihet si e afërt me kryeministrin Vuçiç thekson se “tashmë provinca e jugut të Serbisë mund të marrë pjesë lehtësisht në kampionatin botëror të vitit 2018 në Rusi.
Ndërkaq, e përditshmja Kurir nuk përdor fare terma të ndërmjetëm por atë që ndodhi në kongresin e FIFA-s ku votuan 141 anëtarë dhe cilëson “Skandali i ri i FIFA-s, pranon Kosovën”, duke iu referuar skandaleve të ish-sekretarit Blater.
Por në fakt zvicerani ka pasur marrëdhënie të mira me Beogradin dhe e vonoi pranimin e Kosovës në organizatën botërore të futbollit.
Siç duket, u desh largimi i Sep Blater dhe Michele Platini, me ndihmën e FBI-së amerikane që gjërat të lëvizin në drejtimin e duhur.
Ndërkaq, e përditshmja tjetër nacionaliste, që realisht është gazeta me më shumë shitje e klikime në Serbi, Blic mban të njëjtin qëndrim me Informer për notat dramatike.
“Turp, Kosova tani edhe në FIFA”, titullon kjo gazetë në numrin e sotëm, por që lajmin e ka lënë vetëm me dy rreshta ku nuk ka informuar asgjë,
Ndërkaq, televizioni më i rëndësishëm privat serb, B92, në faqen e tij online i ka kushtuar pranimit të Kosovës në FIFA,një shkrim të gjatë dhe të hollësishëm për të gjitha zhvillimet që kanë ndodhur në Meksiko. Vendimin, votat, deklaratat, dhe në mënyrë të veçantë ka thuajse të gjithë fjalimin e Presidentit të Federatës së Futbollit të Kosovës, Fadil Vokrri.
Në kronikën e tij B92, nuk ka asnjë notë nacionaliste apo emocionale por informon qetë dhe me hollësi.
Deri tani nuk ka ndonjë njoftim të qeverisë serbe për një aksion ligjor apo ndërkombëtar kundër vendimit të Kongresit të FIFA-s për pranimin e Kosovës. Thjesht nuk kanë ç’bëjnë. /tesheshi.com/
