Autoritetet serbe në Merdarë kanë ndaluar një tjetër bashkëpatriot të tyre, pjesë e administratës së Kosovës, gjë e cila ka sjellë reagimin e ashpër të kryeministrit Haradinaj.
“Ndalimi i Nebojsa Jakovljevic nga autoritetet e Serbisë në Mërdarë, është veprimi i radhës i papranueshëm dhe i dënueshëm.
Jakovljevic është këshilltar në Ministrinë e Punës dhe Mirëqenies Sociale, pjesë e partisë SLS dhe vëllai i nënkryetarit të Komunës së Obiliqit, familjen e të cilit e kam vizituar gjatë muajit dhjetor.
Qeveria e Kosovës dënon ashpër këtë formë të presionit dhe kërcënimit nga ana e Serbisë për qytetarët e komunitetit serb të Kosovës.
Ky veprim, nuk është i vetmi dhe as i izoluar, por është pjesë e një fushate të orkestruar të pushtetit serb, për ta kërcënuar drejtpërdrejt sigurinë e vendit tonë.
Kosova është e përkushtuar për dialog, që mundëson arritjen e një Marrëveshjeje përfundimtare me shtetin fqinj dhe secili akt që pengon këtë frymë është i papranueshëm.
Apeloj tek zyrtarët e BE-së si dhe tek Bashkësia Ndërkombëtare, që të reflektojë për t’i bërë presion Beogradit të ndalojë menjëherë veprimet e tilla të njëpasnjëshme kundër qytetarëve të Kosovës, të cilat tregojnë qartë rrugën që ka zgjedhur Serbia kundër lëvizjes së lirë, frymës europiane të bashkëpunimit si dhe vlerave të përbashkëta”, shkruan Haradinaj në FB.
Raportet mes Prishtinës dhe Beogradit mbeten të tendosura për shkak të tarifës së qeverisë së Kosovës për mallrat serbe, e më tej themelimit të ushtrisë së Kosovës. E nën këtë tendosje, vijojnë deklarimet për gadishmëri rreth një marraveshjeje historike që do i jepte fund konfliktit dhe armiqësisë. /tesheshi.com/
