Statuja e Car Llazarit në veri të Mitrovicës, por që do i bëjë hije dhe jugut; e që për shkak të lartësisë, do shndërrohet në një simbol identifikues për qytetin e ndarë mes shqiptarëve dhe serbëve.
Ky është projekti më i fundit i Beogradit, që, në bashkëpunim me strukturat paralele serbe të veriut, pritet të jetësohet me 28 qershor, në 627-vjetorin e betejës së famshme të Fushë Kosovës, ku trupat osmane triumfuan ndaj një koalicioni ballkanas, por që sipas serbëve, ka qenë vetëm një ushtri e tyre.
Burimi që e përcjell informacionin mbi ngritjen e statujës së Car Llazarit në pjesën e veriore të Mitrovicës, tha se kjo është në vazhdën e serbizimit të kësaj pjese të Kosovës dhe se ky është vetëm fillimi.
Më konkretisht, të shtunën rreth mesditës, në qendër të pjesës veriore të Mitrovicës, por pa shumë pompozitet medial, pikërisht në sheshin “Shumadija”, që tek shqiptarët njihet si “Poleti”, kanë punimet për ndërtimin e bazamentit ku do të vendoset shtatorja Car Llazarit.
Lartësia do të jetë 17 metra dhe jo pa shkak, pasi është llogaritur që të shihet edhe nga jugu i Mitrovicës, pra që të diktohet si një simbol vizual për gjithë qytetin.
Tenderin për kryerjen e punimeve për vendosjen e shtatores, sipas burimit, e ka dhënë kryetari i komunës paralele serbe, Aleksandar Spiriq, pa i pyetur fare institucionet lokale dhe ato qendrore të Kosovës, ndërsa financimi është dhënë nga ana e qeverisë së Serbisë.
Burimi më tej ka shtuar se shtatorja e Car Llazarit ka kohë që është punuar në Serbi dhe vetëm po pritet ndërtimi i bazamentit.
Dhe ky përbën rastin e dytë brenda javës, ku qeveria e Serbisë ndërhyn direkt në territorin e Kosovës duke realizuar projektet e saj serbizuese, siç është ai për ndërtimin e 300 shtëpive, kishës dhe shkollës, në vendin e quajtur “Lugina e Diellit” në Zveçanin e vogël, me qëllim të kthimit të mbi 1500 serbëve në Kosovë.
Deri më tani, qeveria e Kosovës është treguar e pafuqishme që t’i ndalojë këto projekte që bijnë era diktat serb, kjo dhe për shkak të thyerjeve të mëdha politike ndërshqiptare që po ndodhin në Prishtinë.
Dhe me gjasë, duke parë se çka ndodhur deri më sot, ku qeveria dhe shteti kosovar pothuajse janë inekzistent në veri, pas dy javësh Mitrovica do e ketë statujën e Car Llazarit që do i bëjë hije këtij qyteti, nëpërmjet së cilit serbët do i japin pasaportën e tyre. /tesheshi.com/
