Nga Blendi Gashi
Përkundër paralajmërimeve të Bashkimit Evropian dhe zyrtarëve të shtetit se më 3 mars do të hapet Ura e Ibrit për qarkullim të njerëzve dhe të automjeteve, një gjë e tillë nuk ka ndodhur. Dje kjo mund ta zbehë një vizitë të pritshme të shefes së diplomacisë së BE-së Frederica Mogherini, aty, tek Ura e në Mitrivicë, pasi të shtunën do të jetë për vizitë në Kosovë.
Dhe arsyeja kryesore për moshapjen e urës është ngecja e punimeve, si dhe nisja e ndërtimit të sheshit “Mbreti Petër”, në veri.
Këtë e ka konfirmuar edhe kryetari i Mitrovicës së Veriut, Goran Rakiq, i cili ka bërë të ditur se ura nuk do të hapet për qarkullim të automjeteve derisa të përfundojnë punët edhe në revitalizimin e sheshit “Mbreti Petër”, e sipas tij kjo punë do të marrë kohë.
Përmes këtij deklarimi të Rakiqit, shihet qartë se fajtor kryesor për moshapjen e urës është komunieti serb në veri dhe se në këtë pjesë fjalën kryesore vazhdojnë ta kenë serbët në shumicën e rasteve.
Se ura nuk do hapet sot e ka konfirmuar edhe kryetari i Mitrovicës, Agim Bahtiri, në një deklarim për mediat duke thënë se Mogherini do vizitojë Mitrovicën, por nuk do të ndodhë edhe hapja e urës.
Ai ka thënë se rihapja e urës kryesore në Mitrovicë do të ndodhë vetëm pas 2 muajve, por ka mohuar deklarimet e Rakiq duke pohuar se hapja e urës nuk ka të bëj me sheshin që po ndërtohet në veri.
“Revitalizimi i urës nuk ka të bëjë me pjesën tjetër, përkatësisht me atë të parkut mbreti Peter 1. Kështu që sa i përket urës nuk do të përfundojë deri në fund të marsit përkatësisht deri në prill, dhe më së shumti do të zgjas deri në maj projekti i revitalizimit të Urës së Ibrit. Pra në fillim të muajit maj ky projekt përfundon atëherë edhe kur i përfundon kontrata kontraktuesit nga BE-ja”, ka thënë Bahtiri.
Edita Tahiri, ministre për Dialog, nuk ka dashur të flasë për këtë çështje duke na rekomanduar që t’i drejtohemi zyrës së BE-së.
“BE është e autorizuar për rivitalizimin e urës së Ibrit, andaj drejtohuni zyrës së BE-së në Prishtinë. Vizita e Mogherinit është më 3 e jo 4 mars”, ka thënë Tahiri, për tesheshi. com, ndërsa nuk ka dashur të jap një qëndrim pse nuk po respektohet afati.
Faruk Mujka, nënkryetar i Mitrovicës, ka thënë për tesheshi. com se bazuar në dinamikën e punëve që janë duke u zhvilluar në revitalizimin e urës, ato nuk do të mund të përfundojnë deri më 3 mars 2017.
“Nuk ka agjë zyrtare sa i përket datës së caktuar. Po ashtu, edhe nga niveli në të cilën gjinden punët nuk ka asnjë mundësi për përfundimin e punëve. Realisht me datën 4 mars punimet mbi urën do të vizitohen nga zonja Mogherini dhe ndoshta kjo ngjarje ka bërë që shumica të mendojnë se me këtë datë do të bëhet hapja e urës për qarkullim”, ka thënë.
Tesheshi.com ynë ka tentuar të marrë një përgjigje nga ana e zyrës së BE-së në Kosovë pse nuk po respektohet afati për hapjen e urës, por nuk janë përgjigjur në pyetjet e dërguara.
Rivitalizimi i urës së Ibrit ishte paraparë të përfundojë më 20 janar, datë kur do të duhej të shënonte edhe hapjen e urës për qarkullimin e automjeteve nga të dyja anët e Mitrovicës, por ngritja e murit në anën veriore të urës më 6 dhjetor, kishte bërë që punimet të ndërpriten dhe për pasojë të shtyhej edhe afati i hapjes së urës. /tesheshi.com/
