Nga Musa Mustafa
Ditë më parë, pjesëtarë të trupave të KFOR-it që veprojnë në veri të Kosovës, janë përzënë nga disa individë serbë pasi janë ulur për një kafe në lokalin e hotel “Aleksandria”, në qendër të Zubin Potokut.
Një dëshmitar në vendngjarje informoi portalin tesheshi.com se situata u acarua së tepërmi kur serbët nisën t`ju hakërrehen ushtarëve të KFOR-it me kërcënime e fjalë fyese, derisa këtë ta fundit u ngritën dhe u larguan nga lokali pa jua bërë dysh fjalën.
“Ju jeni armiqtë tanë, ikni nga këtu. Dhe po erdhët dhe një herë do e pa paguani shtrenjtë. Kjo është Serbi dhe ju këtu e keni të ndaluar të hyni”, kanë qenë disa nga ofezat që u janë drejtuar atyre prej serbëve në lokal.
Dëshmitari tha se pjesëtarët e KFORit, të trembur u larguan, madje duke u kërkuar dhe të falur serbëve.
Dhe ky poshtërim, ose më saktë vetëposhtërim i tyre, ka vijuar dhe me mosdenoncimin në Policinë e Kosoëvs të këtij rasti. Zyrtarë të saj i thanë portalit tesheshi.com, nuk kanë marrë asnjë informacion zyrtar nga ana e KFOR-it se ndonjë pjesëtar i tij është kërcuar në hotelin “Aleksandria” në Zubin Potok; porse jo zyrtarisht, Policia e Kosovës është njoftuar deri diku për incidentin e përfolur pa mundur të hapë hetime, derisa nuk ka patur dhe denoncim. “Derisa ushtarët nuk e kanë paraqitur rastin në Polici, ne nuk mundemi të veprojmë”, tha një autoritet policor në veri.
Por pse në “Aleksandria”?
Hoteli “Aleksandria” në Zubin Potok, është pronë e Ratomir Bozhoviçit, i njohur si personi kryesor i dyshuar për vrasjen e policit të Kosovës, Enver Zymberi.
Portalit tesheshi.com, muaj më parë ka njoftuar lexuesit se tre policë të Kosovës, dy nga stacioni i Policisë në Zubin Potok dhe një nga komanda rajonale e Policisë në veri të Kosovës, kanë marr me qira “Aleksandria”-n e Ratomir Bozhoviçit.
Ky hotel, është kthyer tashmë në vendin ku mblidhen krerët e krimit të organizuar, kontrabandistët, trafikantët e veriut të Kosovës.
Po ashtu, “Aleksandria” tani është kthyer edhe në qendër të prostitucioni nga ku vajza të ndryshme nga Serbia dhe vendet e Lindjes dërgohen për një jug të Kosovës dhe më gjerë në rajon.
Por ja ky hotel, edhe pse dihet se për çfarë shërben dhe se kush strehohet aty, asnjëherë deri më tani nuk është kontrolluar nga Policia e Kosovës, edhe pse prej kësaj të fundit dihet se ç’ndodh aty. Përndryshe nuk do ishte marrë guximi që ashtu, hapur fare, serbët të poshtëronin ndërkombëtarët. /tesheshi.com/
