Presidenti i Kosovës Hashim Thaçi ka vendosur që zgjedhjet për kryetarë të komunave serbe në pjesën veriore të vendit të mbahen me 19 maj, por serbët e zonës kanë dilema nëse do t’u drejtohen apo jo kutive të votimit.
Ata nuk do të votojnë pa e marrë lejen nga presidenti i Serbisë, Aleksandar Vuçiç.
Kjo është konfirmuar pasi përfaqësuesit e “Listës Serbe” do të udhëtojnë në Beograd, me gjasë për të marrë direktivat nga apo për të caktuar qëndrimet e tyre lidhur me këto zgjedhje.
Pjesa veriore e Kosovës, ku hyjnë komunat me shumicë serbe si Mitrovica Veriore, Leposaviqi, Zveçani dhe Zubin-Potoku, ka mbetur pa qeverisje pasi kryetarët e tyre dogjën mandatet si shenjë pakënaqësie ndaj taksës së vendosur gjatë muajit nëntor të vitit te kaluar.
Ironia nuk mbaron këtu, pasi kryetarët në fjalë në letrat e dorëheqjes që i kanë deponuar në Ministrinë e Administrimit të Pushtetit Lokal, Kosovës i janë referuar me “Kosovë e Metohi”, emërtim që Serbia e përdor për shtetin të cilin e konsideron krahinë të veten. /tesheshi.com/
