Serbët e veriut lënë me gisht në gojë Prishtinën zyrtare, ministrja Tahiri i ankohet Bruskelit

Më në fund, Prishtina zyrtare merr kurajo dhe denoncon shkeljet haptazi që Serbia u bën marrëveshjeve të Brukselit. Ministrja për Dialog, Edita Tahiri, tha se Serbia ka shkelur marrëveshjen duke penguar që pjesëtarët e të ashtuquajturës “Mbrojtje Civile” në veriun me shumicë serbe të integrohen në institucionet e Kosovës, proces ky që ishte paraparë të realizohej dje, më 29 dhjetor 2015.

Sipas saj, Kosova kishte kryer të gjitha obligimet për integrim, duke përfshirë procesin e verifikimit, rekrutimit dhe selektimit të kandidatëve në pajtim me Ligjin për Shërbimin Civil, dhe se ceremonia e nënshkrimit të kontratave ishte paraparë të mbahej më 29 dhjetor 2015 në Kuvendin Komunal të Mitrovicës veriore në praninë e BE/EULEX-it.

Por ja që, siç ka informuar znj. Tahiri, përfaqësuesit e qeverisë së Kosovës qenë prezentë ceremoninë e  paralajmëruar, ndërsa pjesëtarët e ish-Mbrojtjes Civile kanë refuzuar të nënshkruajnë kontratat e punësimit, madje as nuk janë paraqitur fare në ceremoni sipas direktivave të Beogradit për refuzim.

Znj. Tahiri tha se ka njoftuar zyrtarisht Bashkimin Evropian për shkeljen e kësaj marrëveshje nga ana e Serbisë.

Duhet kujtuar se tesheshi.com rregullisht ka ofruar fakte për shkeljet që serbët e veriut u bëjnë marrëveshjeve, por duhet të ndodhte e sotmja ku vetë qeveria e Prishtinës të mbetej me gisht në gojë, që  ta kuptonte realisht se sa seriozisht i marrin serbët marrëveshjet e nënshkruara. /tesheshi.com/