Ka dështuar një përpjekje serbe për të mos lënë asnjë mandat shqiptar në parlamentin e Serbisë.
Më saktë, që Shaip Kamberi, zëri potent i legjislaturës së kaluar nga Lugina, të mos qe më aty. Kjo, duke sajuar një sagë zgjedhore në Ternovc të Bujanocit. Por Kamberi e rifitoi mandatin dhe do jetë sërish deputet.
Pas rivotimit për herë të pestë, ai arriti votat e nevojshme (698 nga 711 gjithsej) që të bëhet deputet në Parlamentin e Serbisë.
Kamberi u shpreh se edhe me politikën dhe veprimet penguese të pushtetit, shqiptarët nuk mbetën pa deputet në Kuvendin serb.
Sipas tij, fitorja e mandatit u arrit falë vullnetit të shqiptarëve të Luginës së Preshevës dhe punës së palodhshme të aktivistëve e simpatizantëve.
Kamberi zotohet se do të mbrojë interesat e shqiptarëve të cilët sipas tij, janë të shtypur dhe të diskriminuar. /tesheshi.com/
