Nga Blendi Gashi
Treni ilegal serb me mbishkrime nacionaliste që u ndalua të hynte në Mitrovicë ka tensionuar jashtëzakonisht raportet mes Kosovës dhe Serbisë.
Ndonëse në Bruksel ka vite që po bisedohet për normalizim e tyre, 17 vjet pas mbarimit të luftës, politika e Beogradit, ka treguar fytyrën e saj të vërtetë, armiqësore, aq sa ka kërcënuar sërish me luftë.
Dhe këtë e ka bërë presidenti Tomislav Nikoliq i cili ka thënë se “do të jetë i gatshëm për të dërguar ushtrinë për të mbrojtur serbët në Kosovë, nëse është e nevojshme”.
Kjo deklaratë ka bërë që Bashkimi Evropian të thërret për ulje gjakrash dhe rikthim në tryezën e bisedimeve, derisa KFOR-i si mision paqëruajtës ka thënë se është i gatshëm për intervenim.
“Lugina e Dielli”, “muri” dhe së fundmi “treni”, shihen vetëm përpjekjet e para të shtetit serb për destabizilim të situatës, dhe tentim i tyre për të ndarë veriun.
Njohës të çështjeve të sigurisë kërkojnë nga qeveria të jetë syçelë dhe unike, pasi paralajmërojnë se provokimet veç sa do shtohen javët në vazhdim.
Burim Ramadani, ekpsert i sigurisë thotë se treni ishte një provokim i pashembullt, por institucionet duhet të përgatiten për provokime të reja, më të dëmshme dhe më të rrezikshme.
“Gjuha që ka përdorur Vuçiq është paralajmërim për situata të reja më të renda në javët dhe muajt në vijim. Nuk e di se si do të sillen me të njëjtin rast, pra me trenin, por jam i bindur se provokimet nuk do të ndalen”, thotë Ramadani, për tesheshi. com.
Njohësi tjetër i sigurisë, Fadil Kajtazi, thotë se provokimet serbe kundër shqiptarëve janë të vazhdueshme dhe gjenezën e kanë pas vitit 1847 pas hartimit të dokumentit ofensiv “Nacertanie”, dhe se kanë vazhduar nga rethanat politike në rajonin e Ballkanit dhe më gjërë.
Ai thotë se gatishmëria është e domosdoshme dhe kjo përfshinë segmente të shumta ku prioritet janë diplomacia dhe ruajtja e stabilitetit të brendshëm politik.
“Serbët përmes shërbimeve të tyre në vazhdimësi janë duke sulmuar sigurinë e brendshme në Kosovë duke nxitur konflikte të përmasave që rrezikojnë funksionimin e institucioneve shtetërore”, thotë eksperti Kajtazi, për tesheshi. com.
Andaj, ai shton se provokimet serbe do vazhdojnë sepse në krye të politikës serbe e drejtojnë pasardhës të Millosheviqit.
“Çështja qëndron në faktin se shqiptarët si tërësi dhe Kosova si veçanti duhet të gjej rrugë dhe mjete efikase për t’i minimizuar këto provokime në mënyrë që ato mos të ndikojnë keq në jetën shqiptare.
Vuçiq dhe Daçiq janë pjesë e estabilishmentit politik luftënxitës dhe kriminal. Shto këtu edhe kishën serbe e cila vazhdon të prodhoj shovinizëm në drejtim të shqiptarëve. Nga kjo gjendje e faktorit politik serb dhe situata e rënduar e sigurisë në nivel global, detyrimisht kërkon syçelësi dhe maturi në veprime jo vetëm të qeverisë së Kosoves por të gjithë shqiptarëve. Kombinimet ruso-serbe të vitit 1914 e quan botën në luften e parë botërore, prandaj rendi dhe marifetet tjera janë analogji e këtyre kombinimeve”, thotë Kajtazi.
Drizan Shala, po ashtu ekspert i sigurisë, thotë se shteti serb ka provokuar qe 17 vite me radhë dhe se ato tanimë po bëhen më të sofistikuara me petkun diplomatik.
“Loja e ‘Kalit tëTrojës’, do të vazhdojë sepse qëllimi nuk është hyrja apo jo e trenit, por humbja e përqendrimit nga dy lëvizje të ardhshme. Dalja nga institucionet e Listes Serbe (pas krijimit të Asociacionit të Komunave serbe) me këtë veprim shpallet autonomia e re në këtë AKS dhe bisedimet në BE do të kontribuojnë vetëm një produkt që të krijohet një ‘Rambuje e re’, për ta ridizajnuar Rezulutën 1244 për interesa të AKS-së”, thotë Shala, për tesheshi. com.
Edhe ministri i Brendshëm, Skender Hyseni, deklaroi sot, se “3 apo 4 muaj e ardhshëm janë shumë të ndjeshëm që mund të prodhojnë situata të ndryshme”. /tesheshi.com/
