Duke gjykuar situatën e rëndë epidemike në Kosovë, kreu i Bashkësisë Islame Naim Tërnava kumtoi me pezm lajmin e pezullimit të të gjitha faljeve dhe riteve kolektive në xhami për dhjetë ditë me radhë. Këtu përfshihet dhe falja e Kurban Bajramit.
“Duke e analizuar situatën e cila po mbretëron në Kosovë e goditur pamëshirshëm nga ky virus COVID-19 edhe në mbledhjen e fundit të kryesisë u diskutua rreth këtij problemi.
Ndaj, BIK lajmëron të gjithë besimtarët e Republikës së Kosovës se neser pezullohet falja e namazit të Kurban Bajramit dhe për dhjetë ditë rresht pezullohen faljet, ritet në të gjitha xhamitë, sigurisht me qëllimin e vetëm që të ruhet shëndeti publik i të gjithë qytetarëve të Kosovës.
Me këtë rast mund të them se është një vendim i dhimbshëm i Bashkësisë Islame të Kosovës, mirëpo një vendim me vend, ngase kemi prioritetin të ruajmë shëndetin publik të qytetarëve, sepse kështu na mëson Kur’ani, kështu na mëson Muhammedi a.s”, tha Myftiu Tërnava. /tesheshi.com/
