Ministri i Jashtëm austriak Alexander Schallenberg priti Sekretarin e Shtetit të SHBA Antony Blinken për bisedime dypalëshe në Vjenë. Një nga temat ishte Ballkani Perëndimor, më saktë Bosnja, Kosova e Serbia.
Shefi i diplomacisë austriake tha se është folur për rajonin që është ngjitur me vendin e tij dhe “që është Ballkani Perëndimor”.
“Ne dhe Shtetet e Bashkuara të Amerikës jemi të përkushtuar ndaj të ardhmes evropiane të këtij rajoni dhe qytetarëve të tij. Dhe thjesht doja të theksoja se, midis shumë gjërave që bëjmë së bashku, programi austriak-amerikan Speak Up dhe Bosnja është për mua shembulli më i mirë i bashkëpunimit midis SHBA-së dhe Austrisë që mund të bëjë vërtet ndryshim në terren”, tha Schallenberg.
Ai vuri në dukje se po vijnë vendime të rëndësishme, pasi siç tha, “duke pasur parasysh, mund të themi, rrethin e zjarrit (Rusinë) që rrethon Evropën, ne duhet të sigurohemi që fqinjësia jonë e afërt të stabilizohet dhe të mos ketë vakum në politikë. Pra, ose do të kemi sukses të eksportojmë modelin tonë të jetës, stabilitetin, sigurinë tonë, ose rrezikojmë të përballemi me pasiguri dhe paqëndrueshmëri në rritje”.
Blinken vlerësoi “udhëheqjen afatgjatë të Austrisë dhe udhëheqjen personale dhe angazhimin e Ministrit të Punëve të Jashtme” kur bëhet fjalë për marrëdhëniet midis Vjenës dhe Ballkanit Perëndimor.
“Është diçka që është e afërt dhe e dashur për zemrat tona, dhe veçanërisht për Presidentin Biden, sepse për presidentin dhe për mua – kur fillova në vitet 1990, një pjesë e madhe e fokusit të botës ishte në Ballkan: për Bosnjën, për Kosovën”.
“Dhe një gjë që ne nuk na duhet, që nuk ka nevojë Evropa, dhe veçanërisht vendet e Ballkanit Perëndimor, është kthimi në vitet 1990. Falë angazhimit të Austrisë, lidershipit të Austrisë, ne po ecim me vendosmëri në një drejtim tjetër, një drejtim pozitiv, një drejtim në të cilin Ballkani Perëndimor është realisht i integruar me Evropën. Ne ndajmë synimin për një rajon demokratik, të begatë, paqësor të integruar me pjesën tjetër të Evropës”, tha kreu i diplomacisë amerikane. /tesheshi.com/
