Kryeministri Rama diskutoi me përfaqësues të komuniteteve fetare në vend mundësinë e hapjes së objketeve të kultit, ku pjesa më sensitive është ajo në lidhje me xhamitë, pra komunitetin e besimtrëve muslimanë, për shkak se pezullimi i riteve kolektive ka ndodhur dhe në kohë Ramazani.
Për të parin e qeverisë, duhen nisur përgatitjet që hapja të nis që pas 18 majit.
“Për sa i përket shqetësimit tuaj unë bashkohem me ju se në kuadrin e masave për lehtësimin e ndërveprimeve dhe jetës së përditshme hap pas hapi është e nevojshme që të adresojmë edhe situatën. Të lehtësojmë pengesat e mëdha të ushtrimit të veprimtarisë, por nga ana tjetër duhet të jemi të kujdesshëm dhe ta bëjmë këtë gjë në mënyrë graduale dhe jo të menjëhershme. Kjo kërkon një konsultim me ju se praktikat janë të ndryshme. Brenda një kalendari javor apo mujor keni praktika që nuk janë njësoj”, theksoi i pari i qeverisë.
Në gjykimin e tij, komunitetet duhet të punojnë me ekspertët, që të mundësohet standarti i kërkuar për hapjen.
“Në rastin e komuniteteve fetare të bëhet me marrëveshje nga sonte ose nga nesër. Të jeni të disponueshëm që të keni kontakte me personat që hartojnë masat lehtësuese. Pra si mund të bëhet gradualisht deri në normalizim. Besoj me 18 maj kur do të jetë konfiguruar edhe projekti i fazës së dytë të mund të japim edhe disa indicie konkrete për komunitetet fetare”, tha Rama. /tesheshi.com/
