Senatori republikan Lindsey Graham shprehu mbështetjen e tij të plotë për kërkesën e Turqisë për të marrë F-16 nga SHBA, pasi vizitoi Turqinë gjatë fundjavës.
Senatori nga Karolina e Jugut theksoi, në postimin e tij në Twitter, se ai bëri një “vizitë konstruktive” në Turqi, duke shtuar se “edhe pse ndonjëherë kemi pasur marrëdhënie problematike, është e domosdoshme që Turqia dhe SHBA të ndërmarrin hapa për të forcuar lidhjeve mes dy vendeve”.
“Do të bëj gjithçka në fuqinë time për të mbështetur vendimin e administratës Biden për t’i shitur F-16 Forcave Ajrore Turke. Këta avionë luftarakë, në duart e aleatëve tanë të NATO-s, do të krijojnë një ndjenjë stabiliteti dhe do të rrisin aftësitë e ushtrisë turke, që sigurisht është në interesin kombëtar të SHBA-së”, shtoi senatori i njohur.
Ditë më parë, gjatë Samitit të NATO-s, Presidenti Biden ra dakort për t’i dhënë Turqisë F-16, një çështje që ishte futur në ngërç për shkak të blerjes nga Ankaraja të sistemit S-400 nga Rusia. /tesheshi.com/
