Duke folur dje në Konferencën e 34-të të Përvitshme mbi Marrëdhëniet Amerikano-Turke, senatori republikan John McCain deklaroi se Turqia luan një “rol thelbësor” në ruajtjen e sigurisë dhe stabilitetit rajonal.
Senatori i njohur e vuri theksin tek rëndësia tani më tepër se kurrë e partneritetit mes SHBA-ve dhe Turqisë, për shkak të konflikteve në zhvillim në Siri dhe në Irak.
Një vend të posaçëm ai i kushtoi vendimit të Turqisë për të lejuar përdorimin nga aleatët të bazës ajrore të Inxhirlikut, që, sipas tij, i kishte përmirësuar dukshëm aftësitë luftarake për t’iu kundërvënë militantëve të ISIS-it në Siri.
Baza ajrore e Inxhirlikut u hap në korrik, pasi autoritetet amerikane arritën një marrëveshje me qeverinë turke për zgjerimin e operacioneve kundër ISIS-it.
Konferenca mbi Marrëdhëniet Amerikano-Turke mbahet për çdo vit në Uashington, e diskutimet në të përfshijnë tërë spektrin e marrëdhënieve.
Pjesëmarrja është e nivele të larta, ndërsa aty gjen anëtarë të Kongresit Amerikan e të parlamentit turk, ministra e sekretarë shteti, udhëheqës politikë, drejtues ushtarakë e zyrtarë të administratave. Pjesë e konferencës janë dhe drejtues turq e amerikanë të bizneseve ndërkombëtare, investitorë, etj. Konferenca e këtij viti ka nisur më 27 shtator e përfundon nesër. /tesheshi.com/
