John McCain, senatori amerikan republikan, ka shprehur një qëndrim tejet negativ ndaj marrëveshjes së javës së shkuar mes fuqive botërore për “ndërprerjen e luftimeve” në Siri.
“Le të jemi të qartë se ç’bën kjo marrëveshje: i lejon sulmet mbi Halep të vazhdojnë për një javë tjetër. Ajo u kërkon grupeve opozitare t’i ndalojnë luftimet, por e lejon Rusinë të vazhdojë bombardimin e terroristëve, që ajo këmbëngul se është çdokush, çdo civil,” ka reaguar ashpër McCain.
Presidenti rus Vladimir Putin nuk është i interesuar për të qenë partneri ynë, pohon senatori i njohur amerikan. “Ai kërkon të mbështesë regjimin e Esadit. Ai kërkon ta rivendosë Rusinë si një fuqi të madhe në Lindjen e Mesme.”
“Kjo është diplomaci në shërbim të agresionit ushtarak, dhe po funksionon se ne po e lejojmë.” Kjo është ajo çka mendon McCain për marrëveshjen për “ndalimin e luftimeve”.
Pyet ai me ironi të thellë: “Po nëse Rusia apo regjimi i Esadit e shkelin këtë marrëveshje, cilat janë pasojat?” Duke u përgjigjur po vetë: “Nuk shoh asnjë!”
Përfaqësuesit e fuqive të mëdha arritën një marrëveshje ditë më parë për një “ndalim të luftimeve” në Siri. Por kjo marrëveshje nuk i përfshinte ISIS-in dhe Frontin en-Nusra, duke i dhënë mundësi Rusisë t’i vijonte sulmet ajrore me arsyetimin e goditjes së tyre. Situata në Halep e përparimi i forcave të regjimit sirian janë të ndikuara më së pari nga bombardimet ruse. /tesheshi.com/
