Raporti i fundit i Komitetit Amerikan mbi Marrëdhëniet Ndërkombëtare, të siguruar nga RTK, përmend disa herë shtetin e Kosovës.
Në një botim të titulluar “Sulmi asimetrik i Putinit ndaj Demokracisë në Rusi dhe Evropë”, përmenden raste specifike ku Rusia dëmton progresin e marrëdhënieve serbo-shqiptare.
Në këtë raport kritikohen artikujt e agjencisë propagandistike Sputnik vitet e fundit, në të cilat është shkruar se shqiptarët nga Kosova kanë planifikuar masakra të serbëve në Kosovë me mbështetjen e Perëndimit, dhe se Perëndimi po krijon rrethana të paqëndrueshme, në mënyrë që më vonë të kenë pretekst për okupim.
Më tej thuhet se propaganda e Sputnik-ut, e cila filloi në janar 2015, pati një ndikim negativ në marrëdhëniet serbo-shqiptare, sepse 60 përqind e serbëve filluan t’i besonin Rusisë.
Janë kritikuar edhe shumica e mediave në Beograd, të cilat sipas raportit kanë shumë përmbajtje kundër NATO-s dhe Bashkimit Evropian.
“Se serbët e admirojnë Rusinë, kjo më së miri shihet në rrugët e Serbisë, si dhe kioska të cilat janë plot me suvenire që tregojnë besnikërinë e serbëve ndaj Rusisë dhe liderit të saj Putin”, thuhet në deklaratë.
Marrëdhëniet ndërmjet Rusisë dhe serbëve janë forcuar edhe përmes institucioneve kulturore siç është Kisha Ortodokse dhe organizatat e shoqërisë civile që u japin ndihma humanitare. /tesheshi.com/
