Nismat ligjore të marra pas vrasjes masive në Orlando nuk kanë marrë miratimin në senatin amerikan. Të katër masat ligjore, dy të paraqitura nga demokratët e dy nga republikanët, nuk i siguruan 60 votat e kërkuara për miratimin e tyre.
Masat e demokratëve parashikonin mes të tjerash ndalimin e blerjes së armëve të zjarrit prej atyre që gjendeshin në listat e vëzhgimit të FBI-së dhe të atyre që nuk lejoheshin të fluturonin, si dhe shtimin e kontrollit për blerësit e mundshëm, qoftë në aspektin e së shkuarës së tyre kriminale apo të shëndetit mendor.
Ndërsa republikanët propozonin një periudhë pritjeje prej 72 orësh për ata që kërkonin të blenin armë e që ishin në listat e vëzhgimit të FBI-së, që të mundësohej një urdhër gjykate për bllokimin e shitjes nëse do të ishte e nevojshme. Masa e dytë e tyre propozonte një përmirësim të sistemit të kontrollit.
Republikanët i cilësuan masat ligjore të demokratëve si shumë kufizuese e si nëpërkëmbëse të së drejtës kushtetuese për të mbajtur armë. Në anën tjetër, demokratët i përshkruan propozimet e republikanëve si shumë të dobëta.
Senatori demokrat nga Nevada, Harry Reid, do të thoshte në fjalën e tij, “Eshtë gjithmonë e njëjta gjë. Ne demokratët përpiqemi pas çdo tragjedie të miratojmë masa të ndjeshme sigurie për armët. Fatkeqësisht, përpjekjet tona bllokohen nga republikanët, që i marrin urdhrat nga Shoqata Kombëtare e Armëve.”
Mitch McConnell, një përfaqësues republikan i Kentakit në senat, do të kishte tjetër mendim, duke thënë se masat e demokratëve ishin joefektive, e se demokratëve u mungonte sinqeriteti në përpjekjen e tyre. /tesheshi.com/
