Senati amerikan ka miratuar këtë të martë një projektligj që i lejon të mbijetuarit e sulmeve të 11 shtatorit, e po ashtu dhe të afërmit e të vrarëve, që ta padisin qeverinë saudite e të kërkojnë zhdëmtim.
I quajtur “Drejtësi kundër sponsorizuesve të aktit të terrorizmit”, apo ndryshe JASTA, projektligji është miratuar njëzëri në Senat. Ai duhet të kalojë në Dhomën e Përfaqësuesve, ku ende nuk është parashikuar një votim.
Zëdhënësi i Shtëpisë së Bardhë ka reaguar menjëherë, duke lënë të kuptohet se presidenti amerikan ka një qëndrim kundër projektligjit.
Ja çfarë u tha Josh Earnest gazetarëve: “Duke patur parasysh shqetësimet që kemi shprehur, është e vështirë të imagjinohet që presidenti ta nënshkruajë këtë legjislacion.”
Administrata e presidentit Obama është shprehur kundër projektligjit, ndërsa Obama do të përdorë veton për të.
Arabia Saudite e ka mohur përfshirjen në sulmet e 11 shtatorit të vitit 2001, dhe e ka kundërshtuar fort projektligjin. Ministri i Jashtëm saudit, Adil el-Xhubejri, ka deklaruar se kundërshtia e vendit të tij ndaj projektligjit është bazuar në parimet e marrëdhënieve ndërkombëtare. /tesheshi.com/
