Rezultati më i çuditshëm i ndeshjeve të para të turit të dytë paraeliminator të Champions League-s ka qenë ai i regjistruar në Gjibraltar. Një prej skuadrave më legjendare të futbollit skocez, Sëlltiku i Glasgout, është tronditur nga një humbje e papritur.
Linkoln Red Imps (Lincoln Red Imps), ekipi kampion i Gjibraltarit në 14 sezonet e fundit, në përbërje të të cilit ka një zjarrfikës, një polic e një shofer taksie, ka fituar 1-0 ndaj Sëlltikut, krenarisë së futbollit skocez.
Drejtimin e Sëlltikut e ka marrë jo shumë kohë përpara Brendan Rodgers, ish-tekniku i Liverpulit, por skuadra pak e reflektoi në fushë të shkuarën e saj të lavdishme.
BBC-ja e quan këtë humbjen më të rëndë të Sëlltikut në historinë e vet, duke e përshkruar si të merituar fitoren për amatorët e skuadrës kampione të Gjibraltarit.
Ndërsa The Guardian i kushton këtë titull asaj që ka ngjarë: Tronditja e Gjibraltarit: A është humbja e Sëlltikut nga Linkoln Red Imps më e rënda e pësuar ndonjëherë?
Fitorja e modestëve të Gjibraltarit do të vinte në stadiumin po aq modest “Victoria” pas golit të shënuar në minutën e 47-të nga sulmuesi Lee Casciaro; ky është i njëjti lojtar që shënoi në 2015-tën të parin gol ndërkombëtar të Gjibraltarit.
Rodgers, në debutimin e tij si trajner me Sëlltikun në një përballje zyrtare, u shfaq i zhgënjyer pas takimit, por jo shumë i shqetësuar: “Ka dukshëm zhgënjim. Ishte një ndeshje e vështirë në kushte të vështira. Ne nuk i shfrytëzuam mundësitë tona, ata i shfrytëzuan të tyret. Nuk jam vërtet i tronditur. Ne qëndrojmë të qetë. Duhet të bëjmë një paraqitje të mirë javën tjetër.”
Sëlltiku do të luajë ndaj së njëjtës skuadër amatore pas një jave në Skoci, me synimin për t’u kualifikuar për në turin tjetër. Një eliminim nga të padëgjuarit më parë të Linkoln Red Imps-it do të ishte një katastrofë për Sëlltikun, e veçanërisht për teknikun Brendan Rodgers, të sjellë me aq bujë në krye të tij. /tesheshi.com/
