Një qendër e fëmijëve palestinezë në kampin e refugjatëve Aida në Betlehem ka përgatitur një video ku falënderohet ekipi skocez i Sëlltikut, si dhe tifozët e tij.
Sëlltiku do të luante të mërkurën e shkuar ndaj një ekipi izraelit për play-off-in e Champions League-s, dhe në stadiumin e tij do të shpaloseshin në masë flamujt e Palestinës, në shenjë mbështetjeje për çështjen palestineze.
Veç kësaj, mbështetësit e Sëlltikut, Brigada e Gjelbër, kanë mbledhur fonde për dy projekte palestineze. Një zëdhënës i këtij grupimi, të njohur për solidaritetin me çështjen palestineze, deklaroi se ishin shumë të kënaqur me reagimin ndaj apelit për fonde.
“Reagimi i njerëzve që kanë dhuruar është i jashtëzakonshëm, bujaria e njerëzve ka qenë e jashtëzakonshme, dhe është diçka e madhe ta dish se paratë do të shkojnë për të bërë një ndryshim pozitiv, dhe kjo është në kontrast të qartë me qëndrimin e UEFA-s,” është shprehur zëdhënësi i Brigadës së Gjelbër.
“Nëse do ta kishim lejuar ekipin izraelit të vinte te Sëlltiku pa ndonjë sfidë ndaj politikave izraelite, atëherë kjo i bënte diçka normale krimet e luftës së Izraelit. Ne duam ta kundërshtojmë këtë, e të tregojmë se nuk mendojmë se është e pranueshme,” ka shtuar ai.
Veprimtaria e tifozëve të Sëlltikut ka patur jehonë te palestinezët, që janë përgjigjur me një falënderim. /tesheshi.com/
