Eduard Selami ka bërë deklarimin më të bujshëm që mund ta bëjë një përfaqësues zyrtar i PD-së, që as më shumë e as më pak, të shtunën synon të bëhet kryetar i asaj partie.
Në emisionin e Sokol Ballës, Top Story, Selami tha qartë e prerë se çadra u ngrit për të bllokuar vettingun dhe reformën në drejtësi.
“Basha na vendosi edhe kundër perëndimorëve. Ka thënë për marrëveshjen që më nxorrën në pritë amerikanët dhe gjermanët. Kjo nuk është kështu. Basha e përdori çadrën për të bllokuar reformën në drejtësi. Ajo kauza e çadrës nuk ishte e sinqertë. Hyri në çadër, kështu edhe ashtu dhe sesi doli nuk e morëm vesh. Madje nuk ka as një kontratë të firmosur me zotin Rama”, tha Selami, i cili akuzoi Sali Berishën që po e përdor Bashën si hije dhe mbrojtës të tij.
“Personi që e mbajti zotin Basha kryetar ishte Berisha, ndryshe Basha do të dorëhiqej si kryetar. Modeli i z. Basha nuk është modeli i z. Basha, është një hije e z. Berisha, që nuk mund të përsëritet dhe fakti që në dy zgjedhjet e fundit, Basha ka bërë humbjet më të mëdha të PD-së, mjafton që ai nuk duhet të jetë më në PD”, tha Selami. /tesheshi.com/
