Zbulohet në pikën kufitare të Kapshticës, një ngarkesë droge e destinuar për në Greqi. Gjatë kontrollit me qen antidrogë gjatë natës së lënë pas, janë zbuluar dhe sekuestruar në serbatorin e një kamioni, 92 kilogramë lëndë narkotike e dyshuar kanabis sativa.
Artur Yzeiri, 51 vjeç, banues në fshatin Ravonik dhe Astrit Haxhi, 55 vjeç, banues në Korçë, u arrestuan në vijën e dytë në dalje për nga Shqipëria pasi kamioni me të cilin udhëtonin, i markës “Scania” me targa AA630 KO, u përzgjodh për kontroll të detajuar, ku dhe u gjet lënda narkotike.
Kontrolli më pas, vijoi me procesin e skanimit të kryer nga Dogana, ku në një vend të përshtatur, pikërisht tek pjesa e serbatorit u gjetën 18 pako të mbështjella me letër natriban, me peshë 92 kilogramë lëndë narkotike të dyshuar si kanabis sativa.
Mësohet se Artur Yzeiri ka qenë drejtues i mjetit, ndërsa Astrit Haxhi pasagjer. Lidhur me këtë rast materialet i kaluan Prokurorisë së Krimeve të Rënda në Tiranë, për veprën penale “Trafikimi i narkotikëve, kryer në bashkëpunim. /tesheshi.com/
