Prokuroria e Durrësit, me lejen e gjykatës, ka vendosur sekuestro preventive ndaj objektit ish-“Vollga” në Durrës, nën dyshimin se është përfituar me kryerjen e veprave penale të “Falsifikimit të dokumenteve”, “Shpërdorimit të detyrës” e “Pastrim i produkteve të veprës penale apo i veprimtarisë kriminale”.
Nga hetimet e deritanishme të Prokurorisë së Durrësit, të nisura në bazë të kallëzimit të shtetasit Z.H., janë krijuar dyshime të arsyeshme për paligjshmëri në veprimet e kryera mbi ndryshimet e pronësisë.
Prokuroria e Durrësit konstaton se janë kryer një seri veprimesh të dyshimta për tjetërsimin e pronës në favor të shtetasve të ndryshëm.
Këto veprime të dyshuara antiligjore, sipas Prokurorisë së Durrësit, shtrihen në zyrën hipotekore, zyrat noteriale, por edhe në Gjykatën e Durrësit, e cila ka marrë vendim në kundërshtim me vendimin e Gjykatës së Lartë lidhur me këtë objekt.
Ditën e djeshme ish-kryeministri Sali Berisha ka publikuar në rrjetin social Facebook një dokument, ku sipas tij tregohet kalimi i “Vollgës” në pronësi të Emiljano Shullazit. Për këtë kalim, Prokuroria e Krimeve të Rënda ka nisur hetimet pasi dyshohet se ka ardhur përmes kërcënimeve.
Sipas Berishës, prona te “Vollga” në Durrës është bërë mollë sherri mes bandave, pasi u kërcënua me jetë edhe kreu i Hipotekës Durrës, kurse në fillim të vitit mbeti i vrarë një i ri që dyshohet se ka lidhje me këtë pronë./tesheshi.com/
