Sallata është një pjatë e rëndësishme në përditshmërinë tone, por edhe në raste drekash dhe darkash të veçanta mes miqsh. Nëse i përkushtohemi pak më shumë, duke ndjekur dhe disa hapa të thjeshta, mund të arrijmë ta shndërrojmë në një pjatë fantastike.
Zgjidhni një bazë të shijshme dhe të shëndetshme
Për bazë zgjidhni sallatë jeshile, lakër, spinaq ose rukola. Kjo lloj baze jo vetëm që është e shëndetshme por shkon me çfarëdo lloj përzierjesh.
Shtoni pak drithëra
Drithërat janë të rëndësishme për pasurimin e sallatës me karbohidrate të cilat shërbejnë për t’ju dhënë energji dhe forcë për të përballuar ditën. Ndër drithërat mund të zgjidhni grurë të zier, tërshërë apo susam.
Shtoni tre lloje zarzavatesh
Jo më shumë se tre zarzavate, sepse pastaj shndërrohet në një pjatancë zarzavatesh. Për t’i shtuar ngjyrë sallatës përdorni domate, kastravec dhe karrotë. Nëse nuk e doni shumë të lëngshme në vend të domates mund të shtoni misër apo panxhar. Zarzavatet e forta si karrota dhe panxhari mund të grihen me grirëse.
Zgjidhni proteinat tuaja të preferuara
Mishi i bardhë i pulës ose ton peshku mund të jetë një zgjedhje shumë e mirë. Gjithashtu, kubikë veze të zier dhe sallami do të shkonin shumë me çfarëdo lloj baze.
Yndyrat
Yndyrat e mira, ato të shëndetshmet, janë të domosdoshme për organizmin tonë. Yndyrat mund t’i përftojmë nga përdorimi i frutave të thata apo farave të ndryshme. Ndër frutat e thata mund të zgjedhim arra apo kikirik të ëmbël, sidomos kur ndër bazat kemi zgjedhur rukolan. Për fara mund të zgjedhim fara lule dielli, fara kungulli të zeza dhe të mëdha apo dhe fara çia. /tesheshi.com/
