Shtetet e Bashkuara kanë nisur një hetim për rrjedhjen e informacionit shumë të klasifikuar në lidhje me planet e Izraelit për t’u hakmarrë kundër Iranit.
Ky informacion, shkruan CNN, vjen nga burime të njohura me çështjen, të cilët konfirmuan vërtetësinë e dokumenteve.
Rrjedhja e dokumenteve, të cilat një zyrtar amerikan i përshkroi si “thellësisht shqetësuese”, erdhi në një kohë jashtëzakonisht të ndjeshme për marrëdhëniet midis SHBA-së dhe Izraelit.
Dokumentet, të datës 15 dhe 16 tetor, filluan të qarkullojnë në internet pasi u postuan në platformën Telegram nga një përdorues i quajtur “Middle East Spectator”.
Dokumentet janë klasifikuar si top sekret dhe kanë shenja që tregojnë se vetëm SHBA dhe aleatët e saj – Australia, Kanadaja, Zelanda e Re dhe Mbretëria e Bashkuar – mund t’i shohin ato.
Ata përshkruajnë përgatitjet që Izraeli po bën për një sulm të mundshëm ndaj Iranit, duke përfshirë lëvizjen e municioneve dhe stërvitjet me raketa ajër-tokë nga Forcat Ajrore izraelite.
Sipas burimeve, hetimi po fokusohet se kush ka pasur akses në dokumentet e diskutueshme. Çdo rrjedhje e tillë automatikisht shkakton një hetim nga FBI në bashkëpunim me Pentagonin dhe agjencitë e inteligjencës amerikane. FBI nuk ka komentuar mbi situatën.
Kujtojmë se rrjedhja vjen në një kohë kur Izraeli planifikon t’i përgjigjet sulmeve raketore iraniane më 1 tetor. Një nga dokumentet sugjeron se Izraeli posedon armë bërthamore, të cilat vendi nuk i ka konfirmuar kurrë publikisht.
Megjithatë, dokumenti thotë se SHBA nuk ka marrë asnjë tregues se Izraeli planifikon të përdorë armë bërthamore kundër Iranit. /tesheshi.com/
