Qeveria amerikane beson se Sekretari i Përgjithshëm i Kombeve të Bashkuara Antonio Guterres është shumë i gatshëm për të përshtatur interesat ruse, sipas “rrjedhjeve” të reja nga dokumentet e klasifikuara të Pentagonit që janë shfaqur në rrjetet sociale.
Disa dokumente përshkruajnë komunikimet private midis Guterres dhe zëvendësit të tij, si dhe vëzhgimet e Guterres për luftën në Ukrainë dhe një numër liderësh afrikanë, raporton BBC.
Një dokument “i rrjedhur” u fokusua në marrëveshjen e drithit të Detit të Zi, e cila u arrit në korrik nga OKB-ja dhe Turqia, pas frikës së një krize globale ushqimore.
Aty thuhet se Guterres ishte aq i interesuar në ruajtjen e marrëveshjes, saqë ishte i gatshëm të akomodonte interesat e Rusisë.
“Ndikimi i luftës tek më të varfërit”
“Guterres ka theksuar përpjekjet për të përmirësuar aftësinë eksportuese të Rusisë edhe nëse kjo përfshin subjekte ose individë të sanksionuar rusë”, thuhet në dokument.
Veprimet e tij në shkurt, sipas vlerësimit të përshkruar në dokumentin e klasifikuar, ishin “minim të përpjekjeve më të gjera për të mbajtur Moskën përgjegjëse për veprimet e saj në Ukrainë”.
Duke vënë në dukje se ai nuk do të komentonte mbi dokumentet e “rrjedhura”, një zyrtar i lartë tha se OKB-ja ishte “e shtyrë nga nevoja për të zbutur ndikimin e luftës tek më të varfërit në botë”.
“Kjo do të thotë të bëjmë gjithçka që mundemi për të ulur çmimin e ushqimit dhe për të siguruar që plehrat të jenë në dispozicion për vendet që kanë më shumë nevojë për to,” tha ai.
Rusia shpesh ka treguar se eksporti i drithërave dhe plehrave është i vështirë për të për shkak të sanksioneve ndërkombëtare në fushën e pagesave, sigurimeve dhe transportit detar, ndaj Moska ka paralajmëruar të paktën dy herë se do të pezullojë bashkëpunimin në kuadër të eksportit të grurit në Detin e Zi.
Presidenti “i pamëshirshëm” i Kenias
Një dokument tjetër që daton nga mesi i shkurtit përshkruan një bisedë të hapur midis Guterres dhe zëvendësit të tij, Amina Mohamed.
Në të, Guterres shpreh “habinë” për thirrjen e Presidentes së Komisionit Evropian Ursula von der Leyen që Evropa të prodhojë më shumë armë dhe municione për shkak të luftës në Ukrainë.
Të dy diskutojnë gjithashtu samitin e fundit të liderëve afrikanë, dhe sipas raportimeve, Amina Mohamed thotë se presidenti kenian William Ruto është “i pamëshirshëm” dhe se “nuk i beson atij”.
Zëdhënësi i sigurisë kombëtare të SHBA-së, John Kirby tha se qeveria amerikane po bën gjithçka që mundet për të gjetur burimin e dokumenteve të zbuluara. /tesheshi.com/
