Shpesh e kemi vënë në krye të lajmeve, për bëmat e tij personale e profesionale. Ai provokon qëllimisht, ne i shkojmë pas, po qëllimisht…e secili përmbush qëllimin e tij.
Por portugezi nuk është se luan ndonjë rol në publik, që është i ndryshëm nga jeta private.
Mediat kanë gërmuar pak në jetën e tij, apo kanë mbledhur qëndrime të njerëzve me të cilët ai ka patur të bëjë. Ja cilat janë disa sekrete të jetës së njërit prej trajnerëve më “të zhurmshëm” në botë.
1-Fillimisht le të përmendim 6 gjuhët që ai flet. Përveç gjuhës portugeze, ai flet spanjisht, gjuhën katalanase, anglisht, frëngjisht dhe italisht. I kushtëzuar ose jo prej profesionit, Mourinho-n kudo që “ta hedhësh”, bie “në këmbë”.
2-Dashuria për qentë. Portugezi ka një qen yorkshire me emrin Gullit, emër që i ka vënë se e pëlqente shumë lojtarin holandez. Në vitin 2007, kur ai drejtonte Chelsea, autoritetet përkatëse në Londër kërkuan verifikim shkresor se qeni i tij i kishte bërë të gjitha vaksinat e detyrueshme. Jose nuk u bind, madje i përzuri “veterinerët” qytetit. Ata e denoncuan dhe policia e shoqëroi për disa orë në qelitë e komisariatit, sa u vërtetua që Gullit i kishte kryer të gjitha vaksinat, por Mourinho e bëri rrëmujën se u ndje i parespektuar.
3-Në vitin 2010, kur fitoi tripletën me Interin, Mourinho u përfshi në listën e 10 personave me më influencë në botë. Po atë vit, revista muzikore “Rolling Stones”, e konsideron “rockstarin” e vitit.
4-Para se të bëhej trajner, Jose Mourinho ka qenë mësues fiskulture. Asokohe ai punonte me një përgatitës atletik me emrin Rui Faria. Që prej asaj kohe e deri sot që flasim, Rui Faria është kudo që Jose trajnon.
5-Mourinho është afruar në vitin 2007 edhe me Wrestling. Ai është shfaqur në krah të pronarit dhe wrestlerit McMahon, duke luajtur rolin e komisarit të ndeshjes në Smackdown.
6-Mourinho për njëfarë kohe u afrua edhe me politikën, ku përfaqësuesit e Partisë Socialdemokrate në Portugali, “luajtën” me imazhin e tij, duke e marrë në disa takime elektorale.
7-Kushdo që e ka pasur trajner Mourinho-n, e di se receta e tij e regjimit, nuk i lejon futbollistët të flenë më pak se 8 orë gjumë, e as më shumë se 10 orë. Sipas teorisë së portugezit, nëse lojtari fle më pak, i dobësohen reflekset, por nëse fle më shumë, i shtohet ankthi.
Me të gjitha këto që përmendëm, në të mirë e në të keq, Mourinho nuk është quajtur kot, “The Special One”. /tesheshi.com/
