Theresa May, sekretarja britanike e Shtetit për Punët e Brendshme, ka shfrytëzuar të martën një konferencë të konservatorëve në Mançester për të deklaruar se niveli i lartë i emigracionit është i papërballueshëm dhe e bën të pamundur ndërtimin e një kohezioni social në vend.
E parë si një pasuese e mundshme e kryeministrit David Cameron, May argumentoi në fjalën e saj në konferencë se migrimi masiv i konstatuar gjatë dekadës së fundit nuk është në interesin kombëtar.
Ajo tha mes të tjerash se shkollat, spitalet, strehimi dhe transporti nuk janë në në gjendje ta përballojnë numrin e madh të emigrantëve. “Kur emigracioni është tepër i lartë, kur ritmi i ndryshimit është shumë i shpejtë, është e pamundur të ndërtosh një shoqëri kohezive.”
Sekretarja e Shtetit do t’u jepte përgjigje dhe zërave që pretendojnë se zgjidhja nuk është zvogëlimi i numrit të emigrantëve, por administrimi i kostove të migrimit. “Unë e di se ka ca njerëz që thonë se, ‘po, ka ca kosto emigracioni, por përgjigjja është t’i administrosh pasojat, jo t’i zvogëlosh numrat’. Por jo të tëra pasojat mund të administrohen, dhe bërja kështu për shumë prej tyre vjen me një çmim të lartë. Na duhet të ndërtojmë 210.000 shtëpi të reja çdo vit për t’i dhënë zgjidhje kërkesës në rritje. Nevojitet të gjejmë 900.000 vende të reja shkolle nga vitit 2024. Dhe janë mijëra njerëz të nxjerrë me forcë nga tregu i punës, ende të paaftë për të gjetur një punë.”
Një raport i publikuar javë më parë do të bënte me dije se migrimi për në Britani u rrit me 24 për qind në 2014-ën.
Sipas raportit të nxjerrë muajin e shkuar nga Organizata për Zhvillim dhe Bashkëpunim Ekonomik, numri i emigrantëve që hyjnë në Britani pësoi rritje të ndjeshme, nga 108.000 në 558.000. /tesheshi.com/
