Theodore Theodoridis, pasardhësi i Gianni Infantino-s në postin e sekretarit të përgjithshëm të UEFA-s, ka deklaruar se do të vendosë në rend dite pranimin e Kosovës në këtë organizatë.
Drejtuesi i UEFA-s tha se, në kongresin e 3 majit, një nga pikat e rendit të ditës, përveç zgjedhjes së presidentit të ri, është edhe çështja e pranimit si anëtare e Kosovës.
Nëse arrihet pranimi në organizmin europian të futbollit, atëherë anëtarësimi në FIFA është thjesht një formalitet.
Gjatë një interviste nga Gjeneva për gazetarin Nefail Maliqi të “Presheva Jonë”, numri dy i UEFA-s
deklaroi se, “futbollistët shqiptarë janë të shkëlqyeshëm në fushën e gjelbër të stadiumeve të njohura botërore”.
“Sportistët shqiptarë po mbajnë gjallë jo vetëm tre kombëtare, atë të Shqipërisë, të Kosovës dhe Zvicrës, por edhe ekipe elitare europiane në Zvicër, Francë, Belgjikë, Gjermani e Greqi.”
Pyetjes se a ka gjasa që Kosova të jetë anëtare e familjes europiane të futbollit në muajin maj, Theodore Theodoridis u përgjigj: “UEFA e ka patur gjithnjë në axhendë Kosovën dhe futbollin shqiptar. Në kongresin e saj të ardhshëm, që do të mbahet në Budapest më 3 maj, do të shqyrtohet anëtarësimi i Kosovës, i cili do të bëhet përmes votimeve të vendeve anëtare të UEFA-s. Pranimi i Kosovës në UEFA me 3 maj është në dorë të Fadil Vokrrit. Varet se si ai ka lobuar.”
Kongresi do të zhvillohet në Budapest, pra, në një vend të afërt si me Kosovën, ashtu edhe për kundërshtarin e vet, Serbinë, që i kundërvihet pranimit të saj në organizatat ndërkombëtare. Mundësitë e lobimit janë të mëdha, dhe anëtarësimi bëhet me shumicë votash nga numri i përgjithshëm i anëtarëve. /tesheshi.com/
