Partia Demokratike duket se ka marrë vendimin ekstrem për të bllokuar Kuvendin, pas vendimit të Gramoz Ruçit për përjashtimin e Lulzim Bashës nga seanca.
Deputetët demokratë, mes të cilëve edhe ish-kryeministri Sali Berisha, kanë vendosur të qëndrojnë në sallën e Kuvendit, ndërsa seanca nuk do të nisë në orën 16:00 por në orën 18:00. i gjithë debati dhe tensionet në sallë nisën pasi mazhoranca socialiste rrëzoi me shumicë votash propozimin e PD për zhvillimin e një debati para ngritjes së komisionit ad-hoc për reformën zgjedhore.
Megjithëse u duk sikur pozita dhe opozita kishin rënë dakort për ngritjen e komisionit, palët janë ndarë në faktin se kur duhej zhvilluar debate. Socialistët kanë propozuar debat javën e ardhshme, por demokratët kanë insistuar për tu mbajtur sot. Dhe pas kësaj, kreu demokrat Lulzim Basha tha se opozitës nuk mund t´i hiqet e drejta e fjalës apo t´i mbyllet goja. Kreu i Kuvendit, Gramoz Ruçi, paralajmëroi për përjashtimin e tij nga seanca, ndërsa kjo solli reagimin e grupit parlamentar demokrat.
Për më shumë se 3 orë, Ruçi nuk mundi të mbledhë Kuvendin, pasi Basha nuk ka dalë nga salla, ndërsa deputetët e PD qëndronin në foltore. Kjo e ka detyruar, kryeparlamentarin të shtyjë seancën për në orën 13:00, pastaj njoftoi orën 16:00, ndërsa së fundmi e ka shtyrë edhe me dy orë të tjera.
Ndërkohë deputetët e PD kanë marrë vendimin për të mos u larguar nga salla, çka do të thotë se edhe në orën 18:00 ato do të jenë bashkë me Lulzim Bashën në foltoren e Kuvendit. E gjithë kjo situatë mund të zgjidhet nëse palët do të arrijnë një kompromis, duke u tërhequr nga qëndrimet fillestare, edhe pse duket e vështirë një gjë e tillë.
Deputetët e PD e kanë cilësuar përjashtimin e Bashës nga Ruçi një rast të papreçedentë. Burimet shprehen se nëse mazhoranca do të insistojë në qëndrimin e saj, qëndrimi i grupit të PD-së do të jetë i njëjtë, duke bllokuar punimet e Kuvendit. /tesheshi.com/
