Pas një séance të gjatë, për shkak të delikatesës së çështjes, Gjykata e Posaçme la në fuqi masën e sigurisë “arrest me burg” për kryebashkiakun e Tiranës Erion Veliaj. Ndërsa për të shoqen, Ajola Xoxa, u tregua e “mëshirshme”: nga “arrest me burg”, në “detyrim paraqitje”. Kështu, me të shoqin pas hekurave, ajo do mundet ta çojë e ta marrë djalin e tyre të vetëm nga kopshti.
Siç raportohet, Veliaj është transferuar në paraburgimin e Durrësit, aty ku ndodhet dhe ish-kolegu i tij Ilir Beqja, si dhe ndonjë figurë tjetër politike nga ato në hesape me drejtësinë.
Nga seanca, veçohet një deklarim i tij emotiv, duke u vetëndjerë viktimë e handikapeve të pretenduara të një shoqërie dhe politike plot vese, varrmihëse e njerëzve punëtorë, siç ai klasifikon veten.
“Nuk më është shpjeguar edhe sot pse jam i arrestuar, unë një kryetar bashkie që jam votuar nga populli i Tiranës, kam bërë detyrë time.
I kam hyrë në hak familjes se kam punuar edhe të shtunë edhe të diele edhe për festa kam punuar.
Por mallkuar qoftë ai që punon në këtë vend, se bëhet objekt sulmi dhe gjendet në këtë situatë qe jam unë sot”, citohet të ketë thënë Veliaj. /tesheshi.com/
