Në një seancë të jashtëzakonshme thirrur nga kryeparlamentari Ruçi me kërkesë të kryeministrit Rama për votimin e ministrave të rinj, opozita u irritua pasi kërkoi debat dhe nuk ia dha. Atë e kishte kërkuar për dekretet e presidentit për shkarkim-emërimet në qeveri, por kreu i Kuvendit argumentoi se kjo nuk kish ndodhur kurrë e as që parashikohej në rregullore.
“Kërkova precedentët e kaluar të seancave plenare. Nga 1989 deri në 2018, 37 seanca parlamenare për emërime dhe shkarkime ministrash, pra me 160 dekrete. Kjo që kërkoni ju nuk ka ndodhur kurrë. Nuk parashikohet në asnjë nen të rregullores”, u shpreh Ruçi.
Ndërsa Basha nuk preferoi që të kundërargumentonte me të njëjtën lloj reference, duke zgjedhur të sulmonte Ramën, duke mos kursyer epitetet e rënda.
“Kjo është kapje e parlamentit. Asnjë rregull s’e pengon opozitën të mbajë fjalën. Kuvendi është i marrë peng nga një hajdut psiqik. Nuk mund të ketë më një shtet me një kryeministër psiqik. Sot i dha dërrmën e fundit Kuvendit dhe u përpoq t’i mbyllë gojën opozitës dhe opozitarizmit. Shqipëria nuk mund ta pranojë më këtë gjendje. Ne do jemi në krah të njerëzve që t’u japim atyre zgjidhjen politike. Çdo ditë me Ramën kryeministër është një ditë krize, largimi i tij është emergjencë kombëtare. Kush i shërben atij me vetëdije ose padije, është tradhtar i interesave të popullit të vet, i interesave të qytytarëve dhe dhe duhet të trajtohet si i tillë”, u shpreh ashpërsisht Basha. /tesheshi.com/
