Kuvendi pritet të nisë punimet në seancë plenare në orën 09:00 në një seancë maratonë, e cila pritet të karakterizohet nga debatet dhe akuzat e ndërsjellëta mes palëve.
Në këtë seancë ligjvënësit do të shprehin qëndrimet e tyre apo forcave politike që përfaqësojnë mbi programin e qeverisë “Rama2” që u bë publik një ditë më parë nga kryeministri.
Sikundër raportohet mbi 100 deputetë janë regjistruar për të marrë fjalën, në seancën që mund të zgjasë deri në mesnatë.
Në bazë të rregullores së Kuvendit, çdo deputet dotë ketë të drejtën e fjalës për 20 minuta, ndërkohë që kryeministri dhe lideri i opozitës, kanë një kohë të pakufizuar në debat.
Kryetari i Kuvendit, Gramoz Ruçi, paralajmëroi një ditë më parë deputetët se do të zbatojë me përpikmëri rregulloren, çka do të thotë se nuk do të lejojë fjalime jashtë rradhe, apo përtej kohës që përcaktohet në dokumentin e miratuar me konsensus nga palët.
Të gjithë deputetët e opozitës, PD dhe LSI, 62 në total, janë regjistruar për të folur, ndërkohë që nga grupi parlamentar socialist ka një përzgjedhje.
Opozita, sikundër ka bërë të ditur dje, do të mbajë një qëndrim kritik ndaj programit. PD përmes kreut të saj, Lulzim Basha, dhe ish-kryeministrit Sali Berisha, e cilësoi programin e Ramës si thellim të krizës, mashtrim dhe demagogji.
Kritika të fort aka artikuluar edhe LSI, e cila i drejtoi në seancën e djeshme të pasdites 19 pyetje Edi Rama, ndërsa kreu i grupit parlamentar të kësaj partie, Petrit Vasili, tha se kryeministri nuk kupton nga ekonomia dhe buxhetin e ka ndarë në bazë të emrave të ministrave, jo sektorëve prioritarë.
Gjithsesi seanca e sotme pritet të rikthejë në Kuvendin e Shqipërisë debatet e forta, pasi në dy ditët e para të punimeve parlamentare, ligjvënësit kanë zbatuar me përpikmëri rregulloren, duke shmangur debatet dhe përplasjet mes tyre. /tesheshi.com/
