Me afrimin e orës së fillimit të seancës së Kuvendit të Kosovës kur pritet të hidhet në votim ratifikimi i marrëveshjes së Demarkacionit me Malin e Zi, pra ndarjes së vijës kufitare, po shtohet dhe tensioni në rrugët e Prishtinës, sidomos rreth godinës së Kuvendit.
Forca të shumta policore e blinda, po vendosen në pozicione të atilla për të mbrojtur institucionet nga protestuesit në rast intervenimesh fizike. Ndërkohë, policia bën me dije se ka gjetur në një bodrum në afërsi të vendit të protestave të pritshme, 80 pako me gaz, të destinuara për t’u përdorur nga protestuesit.
Ndërkohë që drejt Prishtinës, janë nisur me qindra aktivistë opozitarë, kryesisht të Vetëvendosjes.
Krerët e kësaj të fundit, sidomos lideri de jure, Albin Kurti, e shprehu dje në formë basti të vënë se Demarkacioni nuk do kalojë, duke aluduar kështu deri në përdorimin e forcës prej tyre.
Por opozita është e ndarë në këtë protestë, ndryshe nga rastet e reagimeve ndaj Zajednicës.
Deri dje, autoritetet e Kosovës, u përpoqën të sqarojnë opinionin se ndarja e vijës kufitare me Malin e Zi është “ok” në çdo pikëpamje.
Ndërkohë, faktori ndërkombëtar, sidomos Brukseli, pret ratifikimin e marrëveshjes, për të bërë të mundur liberalizimin e vizave për kosovarët. /tesheshi.com/
