Kryeministri Ramush Haradinaj, nuk beson se seanca e jashtëzakonshme e thirrur nga opozita për 4 shtator me pikë të vetme të rendit të ditës “nxjerrjen e rezolutës që i ndalon presidentit dhe kujtdo tjetër të negociojë për tërësinë territoriale të Kosovës”, do japë ndonjë rezultat.
“Seanca është ngjarje politike. Disa herë unë vetë e kam thirr seancën për dialog, ama nuk ka dhënë rezultat, po më vjen keq. Zor është me mbërri qëllime të qarta, por në anën tjetër nuk është mirë me dërgu porosi se ne po duam të ndërprejmë dialogun. Kjo mund të nënkuptohet se ne nuk po duam me ec përpara me dialog”, ka deklaruar Haradinaj në një konferencën media.
Ai më tej ka siguruar se territori e kufijtë nuk do të jenë temë e diskutimit.
“Ne duam marrëveshje finale me Serbinë, që përfundon me njohje reciproke. Unë çohna prej tavolinës nëse ato tema hidhen në diskutim dhe nuk jam me shku asaj rruge, nëse dikush thotë se çështja e kufijve është obliguese për arritjen e marrëveshjes me Serbinë”, tha Haradinaj. /tesheshi.com/
